काठमाडौं । राष्ट्रियसभा अध्यक्ष नारायणप्रसाद दाहालले अधिवेशन अवधिभरको कार्यतालिका निर्माण गर्न आवश्यक रहेको बताएका छन् ।

शुक्रबार बसेको राष्ट्रियसभा बैठकमा आफ्ना धारणा प्रस्तुत गर्दै अध्यक्ष दाहालले यस्तो बताएका हुन् । उनले सरकारको तर्फबाट संसद्‌मा पेस गर्ने विधेयकहरू निर्क्योल गरी अधिवेशन प्रारम्भ हुनु अगावै संसद्‌मा दर्ता गर्ने हो भने अधिवेशन अवधिभरको कार्यतालिकालाई मूर्त रुप प्रदान गर्न सहज हुने बताए ।

उनले सभाका गतिविधिहरूलाई थप व्यवस्थित र पूर्वानुमानयोग्य बनाउन सम्भव हुने जिकिर गरे । सभाको १५औँ अधिवेशन अवधिमा दुवै सभाबाट तीन वटा विधेयक पारित भएको र त्यसमध्ये दुई वटा विधेयक राष्ट्रियसभामा नै उत्पत्ति भएका विधेयक रहेको जानकारी दिए ।

सभामा दर्ता भएका हालसम्मका ५९ विधेयकमध्ये ३० वटा विधेयक प्रमाणीकरण भइसकेको पनि उनले जानकारी दिए । दुई वटा विधेयक सभाअन्तर्गत विचाराधीन रहेका छन् भने १० वटा विधेयक राष्ट्रियसभाले पारित गरी प्रतिनिधिसभामा पठाइएको बताए ।

उनले भने, "अबका दिनमा सम्भव भएसम्म अधिवेशन अवधिभरको कार्यतालिका निर्माण गर्नु आवश्यक छ । सरकारको तर्फबाट संसद्‌मा पेस गर्ने विधेयकहरू निक्र्यौल गरी अधिवेशन प्रारम्भ हुनु अगावै संसद्‌मा दर्ता गर्ने हो भने अधिवेशन अवधिभरको कार्यतालिकालाई मूर्त रुप प्रदान गर्न सहज हुने देखिन्छ । यसबाट सभाका गतिविधिहरूलाई थप व्यवस्थित र पूर्वानुमानयोग्य बनाउन सम्भव हुन्छ ।"

उनले विचाराधीन रहेका १० वटा विधेयक यसै अधिवेशन अवधिमा प्रमाणीकरण हुने आशा व्यक्त गरे ।