काठमाडाैं । नेकपा एमालेका अध्यक्ष केपी शर्मा ओलीले गृहमन्त्री रवि लामिछानका विषयमा संसदीय छानबिन समिति माग गरेर प्रतिशोध साँधेको आरोप लगाएका छन् । शुक्रबार बसेको संसदीय दलको बैठकमा उनले सरकारले कदम चालेर समस्याको समाधान गर्नुपर्ने बताए । “सरकारले अब कदम चाल्नुपर्छ । अब सरकारले कदम चालेर समस्या समाधान गर्नुपर्नेछ,” ओलीले भने । 

उनले अहिले कांग्रेसले राजीनामा माग नगरेको भन्दै संसदीय छानिबन समिति बनेपछि राजीनामा माग गर्न थाल्ने बताए । “हामीले रविजीको राजीनामा मागेको छैन भन्नुहुन्छ ।  केही नहुँदा समिति बनाउने अनि समिति बनेपछि तत्काल राजीनामाको खेल सुरू गर्नुहुन्छ,” उनले भने, “समिति बनाएपछि स्वार्थ बाझिन्छ झण्डा हल्लाएर हिँड्न मिल्छ ? भन्ने खेल सुरु हुन्छ ।” 

कांग्रेसको प्रधानमन्त्री बनाउने प्रस्ताव रविले अस्वीकार गरेपछि विभिन्न रिसर्च गरेर आरोप लगाएको ओलीको भनाइ छ । “एकातिर डेढ वर्ष प्रधानमन्त्री भइदिनुस्, यो समीकरण छोड्नुस् । यो गठबन्धनमा आउनुस् डेढ वर्ष प्रधानमन्त्री खानुहोस् भन्न जाने,” उनले भने, “त्यो हुन्न भनेर सम्झौतामा सहमति नगरेपछि विभिन्न फाइल बोकेर रिसर्च गरेर कुद्ने । नेपाली कांग्रेसको यो तरिका फेयर छैन ।”