काठमाडौं । सरकारी छात्रवृत्तिमा बंगलादेशमा एमबीबीएस अध्ययनमा जान लागेका १० विद्यार्थीको नाम हटाइएको छ । उनीहरूका स्थानमा फर्जी नाम सार्वजनिक गरिएको पाइएको छ ।

बंगलादेशको डिरेक्टोरेट जेनेरल अफ मेडिकल एजुकेसन (डीजीएमई)ले गएको अप्रिल ३० मा सार्वजनिक गरेको छात्रवृत्तिका विद्यार्थीको सूचीमा नेपालको शिक्षा मन्त्रालयले सिफारिस गरेका मध्येबाट १० जनाको नाम फरक परेको देखिएको छ ।

मन्त्रालयले एमबीबीएसमा १९ र बीडीएसमा तीन गरी २२ जनाको नाम सिफारिस गरेको थियो । तीमध्ये १० जनाको नाम नभेटिएको र उनीहरूका ठाउँमा केही नयाँ नाम सार्वजनिक गरिएको विद्यार्थीहरूको भनाइ छ ।

पीडित विद्यार्थीको उजुरी परेपछि शिक्षामन्त्री सुमना श्रेष्ठले यसबारे छानबिन भइरहेको जवाफ दिएकी छिन् । प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको बिहीबारको बैठकमा उनले यस्तो बताएकी हुन् ।

“चिकित्सा शिक्षा आयोग र शिक्षा मन्त्रालयले पठाएको सूची एउटै छ, जसमा यी १० विद्यार्थीको नाम उल्लेख छ,” उनले भनिन्, “परराष्ट्रले पनि यही नाम हामीलाई दिएको छ ।”

कूटनीतिक प्रक्रिया भएकाले परराष्ट्र मन्त्रालयमार्फत काम अघि बढाइएको र बंगलादेश सरकारका तर्फबाट के त्रुटि भएको भन्नेबारे खोज्ने काम पनि परराष्ट्रकै भएको मन्त्री श्रेष्ठको भनाइ छ ।

पीडित विद्यार्थी र अभिभावकले मन्त्रालयहरूले आफ्नो जिम्मेवारी पूरा नगरी पन्छिन खोजेको आरोप लगाएका छन् । उच्च शिक्षाको बाटो समेत अन्योलमा परेको भन्दै सहयोगका निम्ति उनीहरू समितिमा पुगेका छन् ।