काठमाडौं । नेकपा एकता राष्ट्रिय अभियानका संयोजक वामदेव गौतमले नेकपा (एमाले)मा जान निर्णय कुरिरहेको बताएका छन् । 

सोमबार वरिष्ठ राजनीतिज्ञ सिद्धिनाथ ज्ञवालीको स्मृति ग्रन्थ विमोचन कार्यक्रममा उनले यसअघिको भेटमा एमाले अध्यक्ष केपी शर्मा ओलीले हाइलेभलको बैठकबाट निर्णय दिने भने पनि निर्णय नदिएको बताए । “हाइलेभल कमिटीले निर्णय पर्खिरहेको सात– आठ महिना भइसक्यो,” उनले भने । 

गौतमले आफू ७५ वर्ष पुगेको बताउँदै जिम्मेवारी दिए पूरा गर्न सक्ने बताए । “मैले पार्टीले दिएको जिम्मेवारी अहिले पनि पूरा गर्न सक्छु,” गौतमले भने । 

उनले नेकपा विभाजनको बेलामा ओलीतिर नजाँदा घाटा भएको बताए । विभाजनको आरोप लाग्ने गरेको भन्दै गौतमले आफूले पार्टी विभाजन नगरेको दाबी गरे । उनले ०५४ सालमा पनि पार्टीले कारबाही गरेपछि मात्रै अर्को दल खोलेको सुनाए ।

मानिसबाट गल्ती कमजोरी हुने भन्दै आफूले त्यसको महसुस गरेको बताए । उनले ओलीको खुट्टा तान्नका लागि नभएर सहयोग गर्नका लागि एमालेमा आउने चाहना रहेको बताए । 

गौतमले पार्टी फुटाउने डर लागे आफ्नो पछाडि मानिस खटाउनू भन्दै कटाक्ष समेत गरे । उनले एमालेमा आउन ओलीले के गर्छन् भन्नेमा आफू पर्खने नीतिमा रहेको बताए । ओली सहभागी कार्यक्रममा उनले नेताहरूलाई भने, “के गर्नुहुन्छ हेर्दै जाऔँ । कमरेड केपी ओलीलाई छिटोभन्दा छिटो एमालेमा ल्याउ भन्नुहोला ।”