काठमाडौं । उपप्रधानमन्त्री तथा परराष्ट्रमन्त्री नारायणकाजी श्रेष्ठ र जापानका विदेशमन्त्री योको कामिकावाबीच भेटवार्ता भएको छ । 

नेपालको एकदिने सद्भावना भ्रमणका लागि आएकी जापानकी विदेशमन्त्री कामिकावाले आइतबार अपराह्न सिंहदरबारमा पुगेर उपप्रधानमन्त्री एवं परराष्ट्रमन्त्री श्रेष्ठसँग भेट गरेकी हुन् । 

दुई पक्षीय सम्बन्धलाई अझ कसरी मजबुत बनाउँदै लैजाने भन्ने विषयमा छलफल गरिएको परराष्ट्रमन्त्री श्रेष्ठले जानकारी दिए । आर्थिक सहयोगात्मक सम्बन्धहरूलाई कसरी अझ फराकिलो बनाउने, अझ वृद्धि गर्ने भन्ने बारेमा पनि आपसी छलफल भएको उनले बताए । उनीहरूबीच विश्वका विभिन्न परराष्ट्रसँग सम्बन्धित मामिलाबारे पनि छलफल भएको थियो ।

"हामीले जापानलाई पुरानो असल मित्र र हाम्रो अत्यन्तै ठूलो विकास साझेदारको रूपमा लिएका छौँ । त्यसकारणले हाम्रो सम्बन्धलाई दुई पक्षीय र यसको सहयोगात्मक सम्बन्धलाई अझ सुदृढ गरेर विस्तार गर्ने बारेमा सबै पक्षहरूमा अहिले छलफल भएको छ । यो औपचारिक सद्भावना भ्रमणमा कुनै सम्झौता वा कुनै एमओयूको एजेन्डा छैन । र हामीले हाम्रा बीचका दुई पक्षीय सम्बन्धहरूलाई अझ दह्रो कसरी बनाउने, मतबुत कसरी बनाउने ? हाम्रा बीचका आर्थिक सहयोगात्मक सम्बन्धलाई कसरी अझ फराकिलो बनाउने, अझ वृद्धि गर्ने भन्ने बारेमा छलफल भएको छ," परराष्ट्रमन्त्री श्रेष्ठले भने । 

जापानकी विदेशमन्त्री कामिकावा उपप्रधानमन्त्री तथा परराष्ट्रमन्त्री श्रेष्ठको निमन्त्रणामा नेपालको एक दिन भ्रमणका क्रममा नेपाल आएकी हुन् ।