काठमाडौं । स्वास्थ्य बिमा बोर्डले ओपीडी र औषधि सेवा सहज बनाउन सेवाप्रदायक संस्थालाई ताकेता गरेको छ । बोर्डले एक महिनाअघि गरेका निर्णय कार्यान्वयन गर्न अस्पताल तथा स्वास्थ्य संस्थालाई पत्राचार गरेको हो ।

बिमामार्फत प्रदान गरिने औषधि वितरणका निम्ति छट्टै रिफिल काउन्टर सञ्चालन गर्न र ज्येष्ठ नागरिकका लागि मंगलबार जेरियाट्रिक क्लिनिक सञ्चालन गर्न निर्देशन दिइएको छ ।

बिमित र अरू बिरामीलाई एउटै लाइनमा राखेर सेवा दिन र बिमा कार्डमा क्यूआर कोर्डमार्फत विवरण राख्न पनि निर्देशन दिइएको छ ।

सबैखाले सरकारी, निजी र सामुदायिक अस्पतालहरूले शय्याअनुसार विशेषज्ञ ओपीडी सेवा प्रदान गर्न पनि बोर्डको निर्देशन छ । १०० शय्या भएका स्वास्थ्य संस्थाले सातामा एक दिन, २०० शय्या भएकाले दुई दिन र ३०० शय्यासम्मका अस्पतालले सातामा तीन दिन नजिकको आधारभूत वा प्रादेशिक अस्पतालमा ओपीडी सेवा दिनुपर्नेछ ।

बिमित बिरामीको हकमा सहज ओपीडी सेवाका निम्ति नजिकको अस्पतालमा रिफर गर्न पनि बोर्डले निर्देशन दिएको छ ।