काठमाडौं । उपप्रधान एवं गृहमन्त्री रवि लामिछाने र मलेसियाका गृहमन्त्री सैफुद्दिन नासुसन स्माइलबीच टेलिफोन संवाद भएको छ । चार दिनअघि लामिछाने र स्माइलबीच फोन संवाद भएको हो ।

सो अवसरमा रोजगारीका निम्ति मलेसियामा रहेका नेपालीको सुरक्षा र अन्तरदेशीय अपराध नियन्त्रण एवं रोकथामका विषयमा छलफल भएको थियो । स्माइलले लामिछानेसँग भएको संवादको विषय फेसबुकमार्फत सार्वजनिक गरेका छन् ।

उनले लेखेका छन्, “मैले गृहमन्त्रीको शपथ लिएपछि नेपालका उपप्रधान एवं गृहमन्त्री रवि लामिछानेसँग पहिलोपटक अन्तरक्रिया गरेँ । आप्रवासी कामदार र सीमापार रोकथामलगायत विषयमा हाम्रो आपसी प्रतिबद्धता छ ।”

गृहमन्त्री लामिछानेका प्रेस संयोजक प्रमोद न्यौपानेले उनीहरूबीच सकारात्मक कुराकानी भएको बताए । “कुनै व्यक्तिविशेषभन्दा पनि मलेसियामा रहेका नेपाली कामदारको सुरक्षा र अन्तरदेशीय अपराधका विषयमा नै गृहमन्त्रीज्यूले छलफल गर्नुभएको हो । दुवै देशको राष्ट्रिय हितका बारेमा छलफल भएको छ ।”

कास्कीको पोखरास्थित सूर्यदर्शन सहकारी र रुपन्देहीको बुटवलस्थित सुप्रिम सहकारीको रकम अपचलन प्रकरणका मुख्य आरोपित ओखलढुंगाका गितेन्द्रबाबु (जीबी) राई मलेसियामा रहेको खुलेको थियो । प्रहरीको अन्तर्राष्ट्रिय अपराध संगठन (इन्टरपोल)मार्फत ‘रेड नोटिस’ जारी गरिँदा पनि मलेसिया सरकारले जीबीलाई नेपाल फर्काउन अस्वीकार गर्दै आएको छ ।

जीबीलाई नेपाल फर्काइदिन सरकारले कूटनीतिक पत्र समेत पठाइसकेको छ । उनलाई अझै नेपाल फर्काउन भने सकिएको छैन । पछिल्लो समय दुई देशका गृहमन्त्रीबीचको संवादलाई महत्त्वका साथ हेरिएको छ । तर, जीबीका विषयमा सो अवसरमा छुट्टै कुनै कुराकानी नभएको प्रेस संयोजक न्यौपानको भनाइ छ ।