काठमाडौं । काठमाडौंमा अझै कम्तीमा तीन दिन वर्षाको सम्भावना छैन । नयाँ प्रणाली विकास नभएको र पुरानो प्रणालीले बदली गराउने सम्भावना नरहेकाले वर्षाको सम्भावना नरहेको मौसमविद् बताउँछन् । 

शुक्रबारबाट नयाँ प्रणाली विकास भएर पहाडी भू–भागमा बदली सुरु हुने मौसमविद् मीनकुमार अर्याल बताउँछन् । “शुक्रबारसम्म कुनै नयाँ प्रणाली विकास हुने देखिएको छैन । शुक्रबारदेखि देशका पहाडी भू–भागमा बदली हुन थाल्नेछ,” मौसमविद् अर्याल बाह्रखरीसँग भन्छन्, “त्यसपछि वर्षाको सम्भावना रहन्छ । यद्यपि, बदली हुनबित्तिकै वर्षा हुन्छ भन्ने होइन, वर्षाको सम्भावना बढ्छ भन्ने हो ।” 

काठमाडौंमा शुक्रबारसम्म वर्षाको सम्भावना नरहेको उनको भनाइ छ । शुक्रबारदेखि बदली सुरु हुने र वाग्मती प्रदेशका पहाडी भू–भागमा वर्षाको सम्भावना रहेकाले काठमाडौंमा पनि पानी पर्नसक्ने उनी बताउँछन् । 

“जति धेरै नजिक भयो त्यति पूर्वानुमान मिल्छ । तीन दिनभन्दा धेरै समयको पूर्वानुमान नमिल्ने सम्भावना पनि हुन्छ,” मौसमविद् अर्याल भन्छन्, “अहिले स्थानीय वायु सक्रिय छ । यसमा चाँडै नयाँ प्रणाली विकास हुने भएकाले पनि लामो समयको पूर्वानुमान नमिल्न सक्छ ।” 

हाल नेपालमा पश्चिमी र स्थानीय वायुको आंशिक प्रभाव रहेको छ ।

यसैबीच, आज लुम्बिनी, मधेस र कोसी प्रदेशका केही र बाँकी भू–भागका थोरै स्थानमा हावाहुरीको सम्भावना छ । त्यसैले उक्त क्षेत्रमा दैनिक जनजीवनलगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेको जल तथा मौसम विज्ञान विभागले जनाएको छ । 

दिउँसो कोसी, गण्डकी र कर्णाली प्रदेशको पहाडी भू–भागमा आंशिक बदली रहनेछ । बाँकी भू–भागमा मौसम मुख्यतया सफा रहनेछ । कोसी प्रदेशको पहाडी भू–भागका एकदुई स्थानमा मेघगर्जन र चट्याङसहित हल्का वर्षाको सम्भावना छ । 

कोसी, गण्डकी र कर्णाली प्रदेशको उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ । लुम्बिनी, मधेस, सुदूरपश्चिम र कोसी प्रदेशका केही स्थान र बाँकी भू–भागका  थोरै स्थानमा हावाहुरीको सम्भावना छ । 

विभागका अनुसार राति कोसी, गण्डकी र कर्णाली प्रदेशको पहाडी भू–भागमा आंशिक बदली रहनेछ । बाँकी भू–भागमा मौसम मुख्यतया सफा रहनेछ । 

कोसी, गण्डकी र कर्णाली प्रदेशको उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ । लुम्बिनी, मधेस, सुदूरपश्चिम र कोसी प्रदेशका केही स्थान र बाँकी भू–भागका  थोरै स्थानमा हावाहुरीको सम्भावना रहेको विभागले बताएको छ ।