काठमाडौं । तीन कम्पनीको वायुयानमा फरक किसिमका समस्या देखिएको छ । सोमबार बिहान बुद्ध एयर, सीता एयर र सिम्रिक एयरको वायुयानमा समस्या देखिएको हो । विमानस्थलका प्रवक्ता सुवास झाका अनुसार, तीन वायुयानमा देखिएको समस्या सामान्य रहेको बताए । “उडान सुरक्षामा कुनै पनि सम्झौता गर्न पाइँदैन । उडानको नियमित प्रसुडरअनुसारहरू हुन्,” प्रवक्ता झाले भने ।

सोमबार बिहान बुद्ध एयरको एटीआर ७२ जहाज (बीएचए १६१) मा प्राविधिक समस्या देखिएको छ । इन्डिकेटरमा प्राविधिक समस्या देखिएपछि बुद्ध एयरको बनारस उड्ने तयारी गरेको जहाज पुनः पार्किङ वेमा फर्काइएको हो ।

“अन्तिम निर्णय पाइलटको हातमा हुन्छ । उडान सुरक्षामा कुनै पनि सम्झौता गर्न पाइँदैन । इन्डिकेसनमा समस्या आए पनि उडान सुरक्षालाई ध्यान राखेर जहाज पार्किङस्थल फर्काएर इन्जिनियरहरूले चेकजाँच गरिरहेका छन्,” झाले भने ।

सीताको जहाजको हाइड्रोलिकमा समस्या देखिएको थियो । रामेछापबाट लुक्ला उडेको सीता एयरको जहाजमा हाइड्रोलिकमा समस्या देखिएपछि काठमाडौं पर्किएको थियो ।  सीता एयरको उडान नम्बर ९०६ जहाज काठमाडौं फर्काएर आकस्मिक अवतरण भएको विमानस्थलको प्रवक्ता सुवास झाले बताए । त्रिभुवन अन्तर्राष्ट्रिय विमानस्थलमा अवतरण गरेपछि जहाजलाई ट्याक्टरले तानेर पार्किङस्थलमा लगिएको उनले जानकारी दिए । पार्किङस्थलमा लगिएपछि प्राविधिक टोलीले जहाजको समस्याबारे चेकजाँच सुरू गरेको छ । “इन्जिनियरले चेकजाँच गर्छन् । उनीहरूले टेक्निकल रिपोर्ट गरेपछि समस्याबारे थाहा हुन्छ,” उनले भने ।

यस्तै, इण्डिकेटरमा ढोका नलागेको संकेत देखिएपछि सिम्रिक एयरको हेलिकप्टर धुलिखेलमा आकस्मिक अवतरण गरिएको थियो । ढोका सही तरिकाले लगाएपछि हेलिकप्टर पुनः लुक्ला उडेको छ ।