काठमाडौं । सहिद स्मारक ‘सी’ डिभिजन लिगमा रोशन क्षेत्रीप्रेरित सोसल वेलफेयर स्पोर्ट्स सेन्टर क्लबले गोलबजार स्पोर्ट्स क्लबविरुद्ध २–१ को जित निकालेको छ ।

बिहीबार सातदोबाटोस्थित एन्फा मुख्यालयमा सम्पन्न खेलमा सोसल वेलफेयरको जितमा दुवै गोल रोशन क्षेत्रीले गरे । गोलबजारका ओमप्रकाश सिंहले गोल फर्काएका थिए ।

खेलको नवौँ मिनेटमा रोशनले गोल गरेपछि पहिलो हाफमा सोसलले १–० को अग्रता बनाएको थियो । तर, ६३औँ मिनेटमा ओमप्रकाशले गोल गरेपछि गोलबजार खेलमा फर्किएको थियो । ६८औँ मिनेटमा रोशनले दोस्रो गोल गरेपछि सोसल वेलफेयरले २–१ को जितसहित प्रतियोगितामा तीन अंक सुनिश्चित गरेको हो । जारी प्रतियोगितामा रोशनको यो छैटौँ गोल हो ।

प्रतियोगितामा सोसल वेलफेयरको यो तेस्रो जित हो । जितसँगै सात खेलबाट १२ अंक जोडेको सोसल तालिकाको पाँचौँ स्थानमा छ । यता, लिगको रेलिगेसन क्षेत्रमा संघर्षरत गोलबजारले भने सात खेल खेल्दा पाँच अंक जोडेको छ ।