काठमाडौं । श्रम, रोजगार तथा सामाजिक सुरक्षामन्त्री डोलप्रसाद अर्यालले श्रम स्वीकृती दुई मिनेट ४४ सेकेन्डमा दिइरहेको बताएका छन् । बिहीबार प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा मन्त्री अर्यालले यसरबारे जानकारी दिएका हुन् ।

बैठकमा सांसदहरूले एक घण्टामा श्रम स्वीकृति दिन निकै कम समय भएको भन्दै आवश्यक कागजातहरू अध्ययन गरेर समय लगाएर दिँदा भविष्यमा श्रमिकहरूले दुःख नपाउने धारणा राखेका थिए ।

जवाफमा मन्त्री अर्यालले श्रम स्वीकृति दिने अधिकारीले कागजात पुगे/नपुगेको हेरेर मात्र स्वीकृत दिने व्यवस्था रहेको भन्दै एक घण्टा पनि नलाग्ने जिकिर गरे । उनले एक घण्टा अधिकतम समय राखिएको भन्दै श्रम स्वीकृति भने २ मिनेट ४४ सेकेन्डमै दिने गरिएको दाबी  गरे । उनले सातै प्रदेशबाट श्रम स्वीकृति दिइरहेको पनि बताए ।

मन्त्री अर्यालले वैदेशिक रोजगारीमा 'फ्री भिसा, फ्री टिकट'को कुरा गरिने भए पनि ९६ प्रतिशत श्रमिकले पैसा तिरेर विदेशिने गरेको पनि बताए ।