इलाम । मध्य वैशाखको प्रचण्ड गर्मी । त्यसमाथि उपनिर्वाचनको रापतापले बलेको इलाम । बुधबार मध्याह्न १२ बजेतिर चुलाचुली गाउँपालिकाको २ नम्बर वडा स्थित स्वामी चोकमा देखिए सुहाङ नेम्वाङ । 

सन्दर्भ उपनिर्वाचनकै हो । उनी अन्तिमा चुनावी आमसभा गर्न यहाँ आइपुगेका हुन् । नेपाली पहिरनमा चटक्क सजिएर आएका उनी सबैको केन्द्रविन्दुमा परे । 

उनी भोट माग्दै अघि बढिरहे । उपस्थित मानिसहरू उनीसँग सेल्फी र तस्बिर खिचाउन तछाड मछाडमा लागे ।  उनी पुगेको केही बेरपश्चात् मात्र चुनावी आमसभा सुरू भयो । प्रमुख अतिथि निम्त्याइएका थिए एमाले अध्यक्ष केपी शर्मा ओली । 

मन्चमा खचाखच नेताको उपस्थिति ।  कुनै समय प्रधानमन्त्री पुष्पकमल दाहाल प्रचण्डका किचन क्याबिनेट सदस्य हरिवोल गजुरेलले तितो इतिहास बिर्सिएर सुहाङलाई मतदान गर्न अनुरोध गरेपछि तलबाट ताली बज्यो ।

“एकपटक वामपन्थी गठबन्धनलाई लागि इलामले सन्देश दिनुपर्छ । इतिहासको तितो बिर्सेर अहिलेको निर्वाचन जित्न जरूरी छ,” गजुरलको अनुरोध थियो । 

जब सुवास सम्झिएर भक्कानिए...

हृदयघातका कारण गएको २०८० भदौ २६ गते पिता सुवासचन्द्र नेम्वाङको निधन भएपश्चात् सुहाङ अकस्मात राजनीतिमा आउनुपरेको हो ।  उनको काधमा दुईवटा मुख्य जिम्मेवारी छ ।  पहिलो पिता सुवासको विरासत जोगाउने र राजनीतिलाई अघि बढाउने । यस्तै पार्टीअध्यक्ष केपी शर्मा ओलीको पनि विश्वास जोगाउने । 

बुधबारको कार्यक्रममा पनि मन्तव्य राख्ने क्रममा सुहाङ भक्कानिए । पिता र उनले छाडेर गएको जिम्मेवारी उनले सम्झिए । 

“बुबासँग खेलेको दिन, बिताएको पल याद आउँछ,” भक्कानिँदै उनले भने, “बुवाले इलामे जनताको शिर झुकाउनेगरी कहिल्यै काम गर्नुभएन । शिर झुक्न दिनुभएन इलाम र इलामबासीको शिर सधै उच्चो बनाउनुभयो ।”
आफू निर्वाचनको दौरान ४२ वटै वडामा पुग्दा आफूले विगत सम्झिएको उल्लेख गरे । 

साथै उनले विशेष परिस्थितिमा चुनाव भएकाले बुबालाई जस्तै जिम्मेवारी आफूलाई दिन अनुरोध गरे । 

सुहाङलाई दोस्रो चुनौती भनेको वाम विरासत जोगाउनु हो ।  किनभने इलाम क्षेत्र वाम किल्लाको रूपमा लिइन्छ । यहाँ सुवासले कहिल्यै चुनाव हार्नुपरेन । ०५२ सालदेखिको निर्वाचन उनले निरन्तर जितेका थिए ।

किनभने गएको निर्वाचन सुवासले ११४ मतको झिनो जित निकालेका थिए ।