काठमाडौं । नेकपा (एमाले)की सचेतक सुनिता बरालले लोकतन्त्रलाई बलियो बनाउन हरेकले आ–आफ्नो भूमिका थप परिष्कृत बनाउन जरुरी रहेको बताएकी छन् ।
लोकतन्त्र दिवसको अवसर पारेर मंगलबार काठमाडौंमा आयोजित ‘लोकतान्त्रिक प्रणाली नीति, नेतृत्व र नैतिकता’ विषय छलफल कार्यक्रममा बोल्दै उनले राजनीतिक दल र नागरिक समाजले लोकतन्त्रलाई बलियो बनाउनका लागि आफ्नो भूमिका थप परिष्कृत बनाउनुपर्ने बताएकी हुन् । सचेतक बरालले लोकतन्त्रलाई बलियो बनाउने गरी राजनीतिक नेतृत्व र त्यसको नैतिकताको विषयमा पनि खबरदारी गर्ने कुरालाई निरन्तरता दिनुपर्ने धारणा समेत राखिन् ।
उनले हालसम्म प्राप्त अनुभव र अनुभूतिका विषयलाई आत्मसात गरेर अघि बढ्नसके समृद्ध नेपालः सुखी नेपालीको राष्ट्रिय संकल्प पूरा हुन कुनै पनि समस्या नहुने विश्वास व्यक्त गरिन् । सचेतक बरालले एउटा सांसदको हैसियतले आफूले लोकतन्त्रको सुदृढीकरणका लागि इमान्दार ढंगले काम गर्ने प्रतिवद्धता समेत व्यक्त गरिन् ।
"लोकतन्त्रलाई बलियो बनाउनका लागि तपाईं, हाम्रो भूमिका थप परिष्कृत बनाउन जरुरी छ । अनुभव र अनुभूतिका विषयहरू कहिल्यै पनि गलत हुँदैनन् भन्ने कुरामा म तपाईंहरूसँगसँगै छु । तर यो सँगसँगै तपाईं हामीले सहकार्य गर्दैगर्दा सामाजिक संरचना भित्र देखिएका नैतिकता विषय र हामीले नेतृत्वलाई गर्दै आएको खबरदारीको विषयलाई भने सँगसँगै निरन्तरता दिउँ," उनले भनिन् ।
सचेतक बरालले राष्ट्रको समृद्धि र स्वाभिमानमा आँच आउन नदिने काममा पनि आफू लागिपर्ने बताइन् ।
