लण्डन । बेलायतको संसदले आफ्नो देशमा शरण लिन चाहने विदेशी नागरिकलाई मध्य अफ्रिकी मुलुक रूवान्डामा पठाउने सम्बन्धी विधेयक सोमबार पास गरेको छ । झण्डै दुईवर्ष लामो विवादपछि सो विधेयक संसदबाट पास भएको हो ।
प्रधानमन्त्री ऋषि सुनकले सो विधेयक पास हुनु अघि बोल्दै प्रवासीलाई रुवान्डा पठाउनका लागि चाँडै एकतर्फी उडान सुरु गरिने बताएका थिए । उनले अवैध प्रवासीलाई बेलायत आउन नदिनका लागि त्यसो गर्न लागिएको जनाए ।
अवैध प्रवासीलाई फ्रान्सको बाटोबाट बेलायतमा आउनबाट रोक्नु विधेयकको मुख्य उद्देश्य रहेको जनाइएको छ । बेलायती राजाले लालमोहर लगाएपछि लागु हुने यो कानुनमा केही कानुनी चुनौती पनि आउन सक्ने जनाइएको छ ।
सर्वेक्षणका अनुसार बहुसंख्यक बेलायती यसको समर्थनमा नै रहेका छन् । तर, थुप्रैको भनाइ के पनि छ भने यो नैतिक रुपले गलत हुनुका साथै खर्चिलो पनि छ । विधेयकले पटक पटक विरोध र संशोधन खेप्नु परिरहेको बीबीसीले समाचारमा जनाएको छ ।
सच्याइएको*
यसअघिको समाचारमा रूवान्डा हुनुपर्नेमा अन्यथा भएकाले सच्याइएको छ ।