तम्घास । गुल्मीमा आगलागीबाट २८ घरगोठ जलेका छन् । शनिबार रातिसम्म लागेको आगोले जिल्लाको इस्मा गाउँपालिका–१, २ र ४ तथा गुल्मीदरबार गाउँपालिकामा क्षति भएको छ ।

इस्मा गाउँपालिका–१ की वसुन्धरा कुँवरको घरगोठ पूर्ण रूपमा जलेको छ । स्थानीय रमेश थापाको घरगोठ, होमबहादुर मल्लको गोठ, लीलाबहादुर थापाको घरगोठ, टीकाबहादुर रायमाझीको घरगोठ एवं रामबहादुर थापाको घरगोठ जलेका हुन् ।

यस्तै, चन्द्रबहादुर कुँवरको घरसहित कुटानी–पिसानी  मिल, किराना पसल र गोठ, गोपालबहादुर थापाको किराना पसल, धर्मराज थापाको घरगोठ र मिल तथा इन्द्रबहादुर थापाको किराना पसल र तीन गोठ नष्ट भएको जिल्ला प्रहरी कार्यालय गुल्मीका प्रवक्ता शंकरप्रसाद पोख्रेलले जानकारी दिए ।

इस्मा गाउँपालिका–२ स्थित सिन्दुखाको रानी सामुदायिक वनमा लागेको डढेलो शनिबार दिउँसोदेखि बस्तीमा फैलिएको थियो । त्यसबाट हस्तीचौरका १५ जनाको घरगोठ जल्नुका साथै दर्जनौँ पशुचौपाया मरेका प्रहरीले जनाएको छ ।

इस्मा गाउँपालिका–४ को हुल र कोटकोटेरीमा लागेको आगोले टोकली बस्नेतको गोठ, सूर्यबहादुर र गुञ्जबहादुर बस्नेतको समेत गोठ जलेको प्रहरी प्रवक्ता पोख्रेलले बताए ।

इस्मा गाउँपालिका–१ मा लागेको आगोका कारण ट्याक्टर चालक १९ वर्षीय हिमाल राना र मुसिकोट नगरपालिका–७, पल्टारका २१ वर्षीय प्रेम राना घाइते भएका छन् । उनहरूका हातखुट्टा र अनुहार जलेको छ । तम्घासस्थित गुल्मी अस्पतालमा घाइतेको उपचार भइरहेको छ । डढेलोका कारण लु४त ६५३५ नम्बरको ट्याक्टर जलेको छ ।

विद्युत् सबस्टेसन जल्यो
शुक्रबारनजिकैको वनबाट फैलिएको डढेलोले गुल्मीदरबार गाउँपालिका–४, वीरवासको विद्युत् सबस्टेसन जलेको छ । सबस्टेसनलाई पूर्ण रूपमा क्षति हुनबाट रेसुंगा नगरपालिकाको दमकलको सहयोगमा सुरक्षाकर्मी र स्थानीयले बचाएका छन् । आगोबाट दुई करोड रुपैयाँबराबरको क्षति भएको छ ।

नेपाल विद्युत् प्राधिकरण गुल्मी वितरण केन्द्रका प्रमुख अर्जुन पोखरेलका अनुसार, कन्डक्टर, केवललगायत सामग्री जलेकाले दुई करोड रुपैयाँको क्षति भएको अनुमान गरिएको छ ।

डढेलोले धेरै क्षति भएको इस्माका तीन स्थानमा राहतको काम सुरु गरिएको प्रमुख जिल्ला अधिकारी कृष्णप्रसाद शर्माले जानकारी दिए । रासस