काठमाडौं । फरच्युना हेल्थ केयर प्रालिले नेपालमै सिरिन्ज उत्पादन सुरू गरेको छ । उद्योग वाणिज्य महासंघका पूर्वअध्यक्ष भवानी राणा अध्यक्ष रहेको फरच्युनाले नेपालमा पहिलोपटक ललितपुरको चुनिखेलमा सिरिन्ज उद्योग सञ्चालनमा ल्याएको हो । 

स्वास्थ्य तथा जनसंख्यामन्त्री यादवले बिहीबार उद्घाटन गरेसँगै फरच्युना ब्राण्डका सिरिन्जकाे बिक्रीसमेत सुरू भएको छ । नेपालमा अन्तर्राष्ट्रियस्तरको सिरिन्जलगायत मेडिकल सामग्री उत्पादन तथा बिक्री वितरण गर्ने उद्देश्यले उद्योग स्थापना गरिएको अध्यक्ष राणाले जानकारी दिइन् । 

नेपाली बजारमा आवश्यक पर्ने सबैखाले सिरिन्ज उत्पादन गरी आत्मनिर्भर बनाउने उद्योगले उद्देश्य लिएको उनले बताइन् । एक वर्षमा ६ करोड ४७ लाखको संख्यामा सिरिन्ज स्वदेश भित्रिए पनि गुणस्तर परीक्षण नहुँदा स्वास्थ्यकर्मी, सेवाग्राही र बिरामीले दुःख पाइरहेको उनको भनाइ छ । फरच्युनाले तत्कालका लागि नेपाली बजारमा बिक्री गर्ने र भविष्यमा विदेशसमेत निर्यात गर्ने लक्ष्य लिएको छ ।

फरच्युना हेल्थ केयरमार्फत् उत्पादन हुने सिरिन्जले विश्व स्वास्थ्य संगठन (डब्लुएचओ)बाट समेत मान्यता लिइसकेको छ । संगठनले औषधि उद्योगका लागि तोकेको मापदण्ड जीएमपीमा आधारित रहेर आईएसओ मापदण्डको स्ट्याण्डर्ड पूरा गरेको उत्पादक कम्पनीले जनाएको छ ।
अध्यक्ष राणाका अनुसार उद्योग स्थापना तथा उत्पादन विविधीकरणका लागि ८० करोड रुपैयाँ लगानी भएको छ ।