काठमाडौं । त्रिभुवन विश्वविद्यालय मानविकी तथा सामाजिक शास्त्र संकाय अन्तर्गतका केन्द्रीय विभागमा अध्ययनरत विद्यार्थीले शोधकार्य (थेसिस)का लागि आर्थिक सहयोग पाउने भएका छन् ।
मंगलबार नेपाल र एसियाली अनुसन्धान केन्द्र (सिनास) र स्वतन्त्र विद्यार्थी युनियन (स्ववियु) बीच उक्त विषयमा समझदारी भएको छ । स्ववियु सभापति श्यामराज ओझाका अनुसार शैक्षिक सत्र २०८०/०८१ देखि लागु हुने गरी सिनासवृत्ति उपलब्ध गराउने उद्देश्यले सिनास र स्ववियु बीच तीन बुँदे सहमति भएको छ ।
सहमतिअनुसार त्रिभुवन विश्वविद्यालय मानविकी तथा सामाजिक शास्त्र संकायअन्तर्गतका केन्द्रीय विभागमा अध्ययनरत विद्यार्थीहरूको शोधकार्य सम्पन्न गर्नको लागि प्रतिविभाग एक विद्यार्थी सिनासवृत्ति स्थापना गरिने सहमति भएको छ ।
“सिनासवृत्ति विभागबाट सिफारिस भइआएका सर्वोत्कृष्ट विद्यार्थीलाई प्रतिविद्यार्थी २५ हजार प्रदान हुनेछ,” ओझाले भने, “केन्द्रीय विभाग र स्ववियुसँग समन्वय गरी आवश्यक कार्यविधि बनाएर शैक्षिक सत्र २०८०/०८१ बाट निरन्तर रूपमा सञ्चालनमा ल्याइनेछ ।”
