काठमाडौं । काठमाडौंसहित देशका केही स्थानमा बिहीबार दिउँसो वर्षा भएको छ । काठमाडौंमा छिटपुट वर्षा भएको मौसम पूर्वानुमान महाशाखाले जनाएको छ ।
कोसी, वाग्मती र गण्डकी प्रदेशका केही स्थानमा मेघगर्जनसहित हल्का वर्षा भएको महाशाखाका मौसमविद् गोविन्द झाले जानकारी दिए । “सोलुखुम्बु, सिन्धुपाल्चोक, कास्की, म्याग्दीमा हल्का वर्षा भएको छ,” उनले बाह्रखरीसित भने ।
काठमाडौंमा उपत्यकामा पनि हल्कासम्म वर्षाको सम्भावना रहेको उनले बताए । अब (दिउँसो साढे ३ बजे दिइएको जानकारी)को दुई/तीन घण्टा वर्षाको सम्भावना रहेको उनले बताए । “काठमाडौं उपत्यकाका कतैकतै छिटपुट वर्षा भएको छ । हल्कासम्म वर्षा हुनसक्छ,” उनले भने, “ठूलो वर्षाको सम्भावना छैन । पश्चिमी क्षेत्रबाट बादल पूर्वतर्फ सर्ने क्रममा छ ।”
काठमाडौंमा आज ‘ठूलो’ हावाहुरीको पनि सम्भावना नरहेको उनले बताए । पश्चिमी तराईतिर हावाहुरीको सम्भावना रहेको उनको भनाइ छ ।
“काठमाडौंमा खासै हावाहुरी हुने स्थिति छैन । पश्चिमी तराईतिर हावाहुरीको सम्भावना छ,” उनले भने ।
देशमा हाल पश्चिमी र स्थानीय वायुको प्रभाव रहेको महाशाखाले जनाएको छ ।
