काठमाडौं । अलेफ ग्रुपअन्तर्गतको मेडियम बाइ अलेफ कम्पनी नेपालका निम्ति गुगलको आधिकारिक बिक्रेता बनेको छ । योसँगै कम्पनीले स्थानीय विज्ञापन एजेन्सी र विज्ञापनदाताका निम्ति गुगल एडमार्फत प्रभावकारी विज्ञापनमा सहयोग गर्ने जनाएको छ ।

कम्पनीले स्थानीय विज्ञापनदाताका लागि सर्च इन्जिन, युट्युब र डिस्प्लेलगायतमा सेवा प्रदान गर्ने जनाएको छ ।

लक्षित उपभोक्तामा विज्ञापनको पहुँच बढाउन प्रभावकारी अभियान सञ्चालन गर्न पनि विभिन्न सुविधा उपलब्ध गराउने कम्पनीले जनाएको छ ।

गुगलमा प्रयोगकर्ताले प्रत्येक दिन अर्बौँपटक विभिन्न सामग्री खोजी गर्छन् । गुगल एडमार्फत विज्ञापनदाताले प्रयोगकर्ताका ती रुचि र आवश्यकताअनुसारका सूचना, प्रडक्ट र सेवाका माध्यमबाट उनीहरूसम्मको पहुँच स्थापित गर्न कम्पनीले सहयोगी भूमिका खेल्ने जनाइएको छ ।

सन् २०२१ मा एलडीएम होल्डिङअन्तर्गत स्थापित मेडियम ग्रुप अहिले एसिया प्यासिफिकसँगै मध्यपूर्व र उत्तर अमेरिकाका निम्ति गुगलको प्रतिबद्ध प्रतिनिधि हो ।

अलेफले डिजिटल इकोसिस्टमका क्षेत्रमा काम गरिरहेको जनाएको छ । यसले विश्वका १३० भन्दा बढी देशका गुगल, मेटा, माइक्रोसप्ट, पिनट्रेस्ट, रेडिट, स्न्याप, स्पोटिफाइ, टिकटक, टिवीच, उबर, एक्सजस्ता ४५ भन्दा बढी डिटिजल प्लेटफर्ममार्फत अर्बौँ विज्ञापनदाता र ग्राहकलाई एकापसमा जोड्ने काम गरिरहेको जनाइएको छ ।