काठमाडौं । इन्डियन प्रिमियर लिग (आईपीएल)मा कोलकाता नाइट राइडर्सले पहिलो हार बेहोरेको छ । कोलकाता सोमबार भएको खेलमा चेन्नई सुपर किंग्सविरुद्ध सात विकेटले पराजित भएको हो ।

एमए चिदम्बरम रंगशालामा सम्पन्न खेलमा कोलकाताले प्रस्तुत गरेको १३८ रनको सहज लक्ष्य चेन्नाईले १७.४ ओभरमा तीन विकेट गुमाएर पूरा गर्‍यो । चेन्नाईको जितमा कप्तान रितुराज गाइकवाडले ६७ रन बनाए । यस्तै, सिवम दुवेले २८, डार्यल मिचेलले २५ र ओपनर रचिन रवीन्द्रले १५ रन थपे । कोलकाताका वैभव अरोराले दुई र सुनिल नारिनले एक विकेट लिए ।

त्यसअघि टस हारेर ब्याटिङमा आएको कोलकाताले निर्धारित २० ओभरमा नौ विकेट गुमाएर १३७ रनको योगफल खडा गरेको थियो । कोलकाताका कप्तान श्रेयस ऐयरले सर्वाधिक ३४ रन बनाएका थिए । ओपनर सुनिल नारिनले २७, आंक्रिस रघुवंशीले २४ र रमनदीप सिंहल १३ रन थपे । कोलकाताका ओपनर फिल साल्ट भने ‘गोल्डेन डक’ भएका थिए ।

चेन्नाईका तुसार देशपान्डे र जडेजाले समान तीन विकेट हात पारे । मुस्ताफिजुर रहमानले दुई विकेट लिँदा महिश थिक्षणाले एक विकेट लिएका थिए ।

जितसँगै पाँच खेलबाट ६ अंक जोडेको चेन्नाई तालिकाको चौथो स्थानमा छ । हारका बावजुद कोलकाता भने चार खेलबाट ६ अंकसहित तालिकाको दोस्रो स्थानमा यथावत् छ ।