काठमाडौं । बझाङमा हालसम्म ६ जनाले उमेदवारी दर्ता गराएका छन् । आउँदो वैशाख १५ गते हुन लागेको उपनिर्वाचनका निम्ति दिउँसो साढे २ बजेसम्म ६ जनाले उमेदवारी दर्ता गराएको जिल्ला निर्वाचन अधिकृत मानबहादुर धामीले बाह्रखरीलाई जानकारी दिए ।

उमेदवार दर्ता गराउनेहरूमा राष्ट्रिय मातृभूमि पार्टीका तर्फबाट गजेन्द्रबहादुर थापा‚नेपाल मजदुर किसान पार्टीका खगेन्द्रबहादुर शाही, नेसनल रिपब्लिक नेपाल पार्टीबाट कमल घर्तीमगर छन् ।

यस्तै, नेकपा (एकीकृत समाजवादी)का तर्फबाट दिलबहादुर सिंह‚ जनता समाजवादी पार्टी (जसपा)का रामबहादुर जाग्री र नेपाली कांग्रेसबाट अभिषेक सिंहले उमेदवारी दर्ता गराएका छन् ।

बझाङमा प्रदेशसभाअन्तर्गत निर्वाचन क्षेत्र नम्बर–१ ‘क’ मा उपनिर्वाचन हुँदै छ ।

सुदूरपश्चिम प्रदेशका तत्कालीन आन्तरिक मामिलामन्त्री समेत रहेका प्रदेशसभा सदस्य पृथ्वीबहादुर सिंहको सवारी दुर्घटनामा निधन भएपछि रिक्त पदमा उपनिर्वाचन गर्न लागिएको हो ।