काठमाडौं । बझाङमा हालसम्म तीनजनाले उमेदवारी दर्ता गराएका छन् । वैशाख १५ गते हुने उपनिर्वाचनका लागि दिउँसो १ बजेसम्म तीनजनाले उमेदवारी दर्ता गराएको जिल्ला निर्वाचन अधिकृत मानबहादुर धामीले बाह्रखरीलाई जानकारी दिए । 

उमेदवारी दर्ता गराउनेहरूमा राष्ट्रिय मातृभूमी पार्टीबाट गजेन्द्रबहादुर थापा‚नेपाल मजदुर किसान पार्टीबाट खगेन्द्र बहादुर शाही र नेसनल रिपव्लिक नेपाल पार्टीबाट कमल घर्तीमगर रहेको उनले जानकारी दिए ।
 
बझाङमा प्रदेशसभाअन्तर्गत निर्वाचन क्षेत्र नम्बर १ ‘क’ मा उपनिर्वाचन हुँदै छ । जसका लागि मुख्य निर्वाचन अधिकृतको कार्यालय जिल्ला अदालतमा बिहान १० बजेबाट साँझ ५ बजेसम्म उमेदवारी दर्ता कार्यक्रम हुने उनले जानकारी दिए ।
 
सुदूरपश्चिम प्रदेशका आन्तिरिक मामिलामन्त्री समेत रहेका प्रदेशसभा सदस्य पृथ्वीबहादुर सिंहको सवारी दुर्घटनामा निधन भएपछि रिक्त रहेको प्रदेशसभा सदस्य पदमा उपनिर्वाचन हुँदै छ ।