पोखरा । पुरानो गठबन्धन भत्किनेबारेमा एमाले अध्यक्ष केपी शर्मा ओली र प्रधानमन्त्री पुष्पकमल दाहाल ‘प्रचण्ड’ बीचको निरन्तरको वार्ता कांग्रेसले थाहा पाउन सकेन । कांग्रेस आफैँ सहभागी भएको सरकारका प्रधानमन्त्रीको बारेमा थाहा पाउन नसकेको भन्दै कांग्रेसबाट सहभागी मन्त्रीको पनि आलोचना भयो ।

गत वर्ष बनेको कांग्रेस–माओवादीसहितको गठबन्धन फागुन २१ गते भत्कियो । अहिले एमाले–माओवादीसहितको नयाँ गठबन्धन बनेको छ । नयाँ गठबन्धन बनेपछि प्रचण्डले धोका दिएको निष्कर्षमा कांग्रेस पुगेको छ ।

कांग्रेस सभापति शेरबहादुर देउवा स्वयंले प्रधानमन्त्रीलाई धोकेबाजको संज्ञा दिएका छन् । सत्ताबाट बाहिरिएपछि रन्थनिएको कांग्रेसलाई शुक्रबार एमाले अध्यक्ष ओलीले गठबन्धन भत्काउँदैछौँ भन्नेबारेमा कति महिना पहिले सूचना दिनुपर्ने हो भन्दै व्यंग्य गरेका छन् । एमाले कास्कीको ११औँ अधिवेशनबाट निर्वाचित पदाधिकारी तथा सदस्यहरूको शपथग्रहण समारोहमा सहभागी भएका ओलीले एमालेविरोधी दक्षिणपन्थी गठबन्धन भत्काइएको जनाए ।

“आन्तरिक र बाह्य दक्षिणपन्थी शक्ति, पुँजीवादी शक्तिहरू मिलेर हाम्राविरुद्धको हमला अत्यन्त तीव्र पारे । र, हामीले जुन परिवर्तन गर्न खोजेका थियौँ, त्यो परिवर्तन, जे गरेका थियौँ त्यसलाई भत्काउन सफल भए,” ओलीले भने, “त्यसपछि उनीहरू उत्सव, खुसीयाली मनाउन व्यस्त भए । एमालेलाई कमजोर पारियो, अब सिध्याइयो भने । फागुन २१ गते रातारात कसैले थाहा नपाइकन यसरी ढाल्न पाइन्छ भनेर कराए । अनि उनीहरूलाई कति महिना पहिला सूचना दिनुपर्ने ? कति दिन अगाडि सूचना दिनुपर्ने ?”

ओलीले एमाले छिर्के लागेर लडेपछि चुपचाप नबस्ने उठेर हमला गर्ने पार्टी रहेको बताए । “जे होस एमालेले आफ्नो तागत फर्किफर्किकन देखाएको छ । एमाले छिर्के लगाएर लडाए भन्दैमा लडियो भनेर चुप लागेर सुत्दैन । यो फेरि उठ्छ र झम्टिन्छ भन्ने थाहा पाउनुपर्छ ।” उनले भने ।

कांग्रेससहितको गठबन्धनलाई उनले खरानीको डल्लोको संज्ञा दिए र यसको विकल्प फुट्नु नै रहेको बताए । उनले भने, “त्यतिबेलाको गठबन्धनलाई मैले भनेको थिएँ, यो खरानीको डल्लो हो, सुक्यो भने पनि फुट्छ भिज्यो भने पनि फुट्छ । जे गरे पनि फुट्छ भनेर मैले भनेको थिएँ । त्यो फुट्नेवाला थियो । फुट्नुको विकल्प नै थिएन । नभन्दै खरानीको डल्लो फुट्यो । एमालेविरुद्धको दक्षिणपन्थी गठबन्धन त्यो तोडियो ।”