काठमाडौं । वर्ल्ड सेन्ट्रल किचेन संगठनले मंगलबार गाजामा इजरायली हवाई हमलामा सातजना कर्मचारीको मृत्यु भएपछि आफ्नो सहायता कार्य तत्काल निलम्वन गर्ने घोषणा गरेको छ । गैरलाभकारी संस्था किचेनले गाजामा इजरायली सेनाको आक्रमणमा आफ्नो टोलीका सात सदस्यको हत्या भएको पुष्टि गरेको छ ।
इजरायल डिफेन्स फोर्ससँगको समन्वयको बावजुद त्यहाँ खाद्यान्न सहायता अनलोड गरेपछि डेर अल–बालाह गोदामबाट बाहिर निस्कने क्रममा टोलीमाथि आक्रमण भएको बताइएको छ । प्यालेस्टाइन रेड क्रिसेन्ट सोसाइटीले मंगलबार कठिन उद्धार कार्यपछि टोलीले सात कर्मचारीको शव निकाल्न सफल भएको बताएको छ ।
डब्ल्यूसीकेका अनुसार सात कर्मचारी प्यालेस्टाइन, अष्ट्रेलिया, पोल्यान्ड, बेलायत, क्यानडा र संयुक्त राज्य अमेरिकाका रहेका छन् । इजरायलले मंगलबार आक्रमणको जिम्मेवारी लिएको छ ।