काठमाडौं । धितोपत्र दोस्रो बजार मापक नेप्से परिसूचक सोमबार पनि घटेर कारोबार भएको छ । आज नेप्से परिसूचक ६.२६ अंकले घटेर २०१२.०७ विन्दुमा बन्द भएको हो ।
बजार घटेसँगै कारोबार रकम पनि घटेको छ । यस दिन दुई अर्ब ८७ करोड ४७ लाख रुपैयाँमा सेयर कारोबार भएको हो । नेपाल स्टक एक्सचेन्ज (नेप्से)का अनुसार आइतबार तीन अर्ब २० करोड रुपैयाँको सेयर कारोबार भएको थियो ।
यस दिन ८६ कम्पनीको सेयर मूल्य वृद्धि भएको छ भने १५१ कम्पनीको सेयर मूल्य घटेको छ । आठ कम्पनीको सेयर मूल्य भने स्थिर छ । गुरास लघुवित्त वित्तीय संस्थाको सेयर मूल्य सर्वाधिक वृद्धि भएको छ । यो कम्पनीको सेयर मूल्य १० प्रतिशतले वृद्धि भएको छ ।
त्यस्तै, माया खोला हाइड्रोपावर लिमिटेडको सेयर मूल्य पनि १० प्रतिशतले वृद्धि भएको छ । रिभर फल्स पावर लिमिटेडको सेयर मूल्य ९.९८ प्रतिशतले घटेको छ । सोमबार कारोबारमा आएका १३ समूहगत परिसूचकमध्ये होटेल तथा पर्यटन समूहको परिसूचक वृद्धि भएको छ । यो समूहको परिसूचक १.१६ प्रतिशतले वृद्धि भएको छ ।
