काठमाडौं । पाकिस्तानी क्रिकेट टिमको कप्तानीमा पुनः बाबर आजम नियुक्त भएका छन् । पाकिस्तानी क्रिकेट बोर्ड (पीसीबी)ले आइतबार ‘ह्वाइट बल’ क्रिकेटको कप्तानी पुनः आजमलाई सुम्पिने निर्णय गरेको हो । 

“छनोट कमिटीबाट एकमत सिफारिस आएपछि पीसीबीका अध्यक्ष महसिन नाक्वीले बाबर आजमलाई पाकिस्तानी क्रिकेट टिमको ह्वाइट बल (एकदिवसीय र ट्वान्टी–२०) कप्तानमा नियुक्त गरेका छन्,” पीसीबीले एक्समा लेखेको छ । 

आजमले यसअघि गत वर्षको अन्त्यसम्म पाकिस्तानी टिमको कप्तानी सम्हालेका थिए । तर, भारतमा भएको एकदिवसीय विश्वकपमा टोलीको प्रदर्शन खराब रहेपछि उनले जिम्मेवारीबाट राजीनामा दिएका थिए । 

सोही समय टिममा विभिन्न परिवर्तन गरिरहेको पीसीबीले टेस्ट टोलीको जिम्मेवारी सान मसुद र ट्वान्टी–२० क्रिकेटको जिम्मेवारी साहिनसाह अफ्रिदीलाई सुम्पिएको थियो । तर, अफ्रिदीको कप्तानीमा पाकिस्तानले खेलेको पहिलो शृंखला न्युजिल्यान्डसँग ४–१ ले हारेको थियो । अफ्रिदीको कप्तानीको आलोचना सुरु भएपछि वाहब रियाज, असद सफिक, अब्दुल राजक र मोहम्मद युसुफको टोली छनोट प्यानलले आजमलाई पुनः कप्तानीको जिम्मेवारी सुम्पिने निर्णय गरेको हो । 

यसअघि सन् २०१९ मा पाकिस्तानी टोलीको कप्तान बनेका बाबरले २०२३ को नोभेम्बरमा जिम्मेवारी छोडेका थिए ।