काठमाडौं । फिफा विश्वकप–२०२६ छनोटको दोस्रो चरणका निम्ति बहराइन पुगेको नेपाली राष्ट्रिय फुटबल टिम स्वदेश फर्किएको छ । नेपाली टिम बुधबार राति फ्लाई दुबईको फ्लाइटमार्फत त्रिभुवन अन्तर्राष्ट्रिय विमानस्थलमा आइपुगेको हो । नेपाली टिमको स्वागतका निम्ति अखिल नेपाल फुटबल संघ (एन्फा)का प्रवक्ता विमानस्थल पुगेका थिए ।
छनोटको समूह ‘एच’मा रहेको नेपालले बहराइनमा घरेलु टिमसँग दुई खेल खेलेको थियो । बहराइनसँगको पहिलो खेल नेपालमा हुने तालिका थियो । तर, अन्तर्राष्ट्रियस्तरको दशरथ रंगशाला खेल्नलायक नभएपछि ‘होम’ र ‘अवे’ दुवै खेल बहराइनमा खेलिएको हो । पहिलो खेलमा नेपाल ५–० र दोस्रोमा ३–० ले पराजित भएको थियो ।
छनोटको दोस्रो चरणमा हालसम्म चार खेल खेले पनि नेपाल अंकविहीन छ । नेपालले यसअघि युनाइटेड अरब इमिरेट्स र यमनसँग पनि हार व्यहोरेको थियो । नेपालले अब आउँदो जुनमा यूएई र यमनसँग खेल्नेछ ।
