काठमडाौं । एसियाली पूर्वाधार लगानी बैंक (एआईआईबी)को सञ्चालक समितिका पदाधिकारी र नेपालको निजी क्षेत्रका प्रतिनिधिहरूसँग नेपाल उद्योग वाणिज्य महासंघका अध्यक्ष चन्द्र ढकालले नेपालमा लगानी गर्न आग्रह गरेका छन् । मंगलबार चन्द्रागिरीमा भएको भेटमा नेपालमा विभिन्न क्षेत्रमा लगानीका सम्भावित अवसरको खोजीमा विशेष छलफल भएको थियो ।

एआईआईबीले यातायात, उर्जा र शहरी विकासलगायत क्षेत्रमा कसरी बढी योगदान दिन सक्छ भन्ने विषयमा पनि छलफल भएको छ । नेपालको दिगो विकासमा निजी क्षेत्रले कसरी योगदान गर्न सक्छ भन्ने विषयमा पनि छलफल भएको छ ।  

महासंघका अध्यक्ष ढकालले बोर्डका पदाधिकारीहरूलाई निजी क्षेत्र एआईआईबीजस्ता संस्थाहरूसँग रणनीतिक साझेदारीमार्फत् सम्भावनाको फाइदा लिन उत्सुक रहेको जानकारी दिए । ढकालले नेपाल रणनीतिक रूपमा दुई ठूला अर्थतन्त्र भारत र चीनको बीचमा रहेकाले नेपालमा उत्पादित वस्तुलाई विश्वका दुई ठूला बजारमा सहज पहुँच पुर्याउन सक्ने बताए ।

ढकालले नेपालमा पूर्वाधार, ऊर्जा, पर्यटन र कृषिमा लगानीको सम्भावना रहेको बताए । 

महासंघका अध्यक्ष ढकालले नेपाल सरकारले लगानीको वातावरण सुधार गर्न १२ वटा ऐन परिमार्जन गर्ने प्रक्रियामा रहेको बताएका थिए । 

ढकालले आगामी अप्रिल २८ देखि २९ गतेसम्म आयोजना हुने लगानी सम्मेलनबारे अधिकारीहरुलाई जानकारी दिएका छन् ।