काठमाडौं । राष्ट्रिय भूमि आयोग खारेज गर्ने सरकारको निर्णयप्रति विघटित आयोगका पदाधिकारीले आपत्ति जनाएका छन् । शनिबार काठमाडौंमा पत्रकार सम्मेलन गरी विघटित आयोगका अध्यक्ष केशव निरौलाले सरकारको सो निर्णयको निन्दा गरे ।

उनले सुकुम्वासीको समस्या समाधान हुन नदिने गरी सरकारले सो आयोग खारेज गरेको आरोप समेत लगाए । संविधानबमोजिमको सो आयोगलाई पूरा कार्यकाल काम गर्न नदिई सरकारले सुकुम्वासीका नाममा राजनीति गरिरहेको उनले जिकिर गरे ।

निरौलाले सरकारको सो निर्णयले सुकुम्वासी, अव्यवस्थित बसोवासीलाई धोका दिने काम गरेको बताए ।

“...बडो दुःख लागेको छ । आश्चर्यचकित लागेको छ । यहाँनिर मेरो अध्यक्ष पद रहने कि नरहने भन्ने विषयभन्दा पनि यो सुकुम्वासीहरूमाथिको राजनीति कहिलेसम्म हो ? हुन त सुकुम्वासीहरूको राजनीति नेपालका तीनवटै राजनीतिक दलहरूले गर्दछन्,” उनले भने ।

तत्काल पुनर्गठन गर्ने गरी नेपाली कांग्रेसका सभापति शेरबहादुर देउवा नेतृत्वको तत्कालीन सरकारले गठन गरेको सो आयोग यही चैत्र ८ गते बसेको मन्त्रिपरिषद्को बैठकबाट खारेज गर्ने निर्णय गरिएको थियो । न्युज एजेन्सी नेपाल