काठमाडौं । जिल्ला प्रहरी परिसर काठमाडौंले होली पर्वलाई मध्यनजर गरी सुरक्षा व्यवस्था मजबुत बनाएको छ । आइतबार (भोलि) पहाड र सोमबार तराईका विभिन्न जिल्लामा होली पर्व मनाइँदै छ ।

होलीको निम्ति प्रहरीले देशभरका सबै ठाउँमा सुरक्षा व्यवस्था मजबुत बनाएको जनाएको छ ।

शनिबार न्युज एजेन्सी नेपालसँग कुरा गर्दै जिल्ला प्रहरी परिसर काठमाडौंका प्रमुख एवं प्रहरी वरिष्ठ उपरीक्षक (एसएसपी) भूपेन्द्रबहादुर खत्रीले मर्यादित रूपमा होली पर्व मनाउन आग्रह गरे । विगतका घटनालाई मध्यनजर गरेर सुरक्षा व्यवस्था मजबुत बनाइएको उनले बताए ।

काठमाडौंमा उपत्यका ट्राफिक प्रहरी कार्यालय र काठमाडौं परिसरका जनशक्तिलाई संयुक्त रूपमा परिचालन गरी ९० भन्दा बढी स्थानमा ‘चेकिङ’को व्यवस्था गरिएको उनले जानकारी दिए ।

उनले सम्भावित घटना हुन नदिन भीडभाड हुने ठाउँमा ड्रोनबाट पनि निगरानी गर्ने तयारी गरिएको बताए । होली मर्यादित रूपले मनाउन सामाजिक सञ्जालबाट पनि नेपाल प्रहरीले सचेत गराएको उनले उल्लेख गरे ।

होली खेल्न नचाहनेलाई जबरजस्ती रङ दल्ने, लोला हान्ने काम नगर्न सचेत गराउँदै उनले सुरक्षित र संयमित भएर पर्व मनाउन अनुरोध गरे ।

नराम्रा गतिविधि गरेको देखे वा थाहा पाए नेपाल प्रहरीको टोल फ्री नम्बर १०० र जिल्ला प्रहरी परिसर काठमाडौं प्रमुखको नम्बर ९८५१२०५५५५ मा सम्पर्क गर्न उनले आग्रह गरे । न्युज एजेन्सी नेपाल