काठमाडौं । इन्टर पार्लियामेन्ट्री युनियन (आईपीयू)को सम्मेलनमा भाग लिन सभामुख देवराज घिमिरे नेतृत्वको टोली बिहीबार राति स्विजरल्यान्ड प्रस्थान गरेको छ । आईपीयूको १४८औँ महासभामा भाग लिन राजनीतिक दलका प्रमुख सचेतकसहित १० जनाको टोली लिएर सभामुख स्विजरल्यान्ड गएका हुन् ।

आईपीयू महासभा चैत १० देखि १४ सम्म स्विजरल्यान्डको जेनेभामा हुँदै छ । सभामुखको टोलीमा प्रमुख दलका प्रमुख सचेतक सहभागी छन् । कांग्रेस प्रमुख सचेतक रमेश लेखक, एमाले प्रमुख सचेतक महेश बर्तौला, माओवादी प्रमुख सचेतक हितराज पाण्डे र राष्ट्रिय स्वतन्त्र पार्टीका प्रमुख सचेतक सन्तोष परियार भ्रमण दलमा छन् ।

यस्तै, राष्ट्रियसभाकी माओवादीतर्फकी सदस्य गंगाकुमारी बेलबासे, संसद्का महासचिव पद्मप्रसाद पाण्डेय, संसद् सचिवालयका प्रवक्ता एकराम गिरी, सभामुख घिमिरेका प्रमुख स्वकीय सचिव तेजप्रकाश भट्टराई र संसद् सचिवालयका उपसचिव प्रदीप गुरागाईं टोलीमा छन् ।

भ्रमणमा जाने भएपछि सभामुख घिमिरेले प्रतिनिधिसभा बैठक चैत १८ गतेसम्म स्थगित गरेका छन् । सभामुखको अनुपस्थितिमा बैठक सञ्चालनसहितका काम गर्ने उपसभामुख इन्दिरा राना भने भ्रमणबारे बेखबर छिन् । उनले विभिन्न व्यक्तिमार्फत सुन्नेबाहेक आफूले औपचारिक जानकारी नपाएको बताइन् ।

"कार्यवाहक जिम्मेवारी हैन, सभामुख विदेश जाँदै गरेको औपचारिक जानकारीसमेत मलाई छैन," उपसभामुख रानाले भनिन्, "संसद् १८ गतेसम्म स्थगित गर्नुभएको जानकारी मलाई छ ।"

उनले कार्यवाहक जिम्मेवारी नदिएको विषयमा थप टिप्पणी नगर्ने बताइन् ।

प्रतिनिधिसभा नियमावली, २०७९ को नियम ६ ले बैठक सञ्चालन र स्थगनसम्बन्धी व्यवस्था गरेको छ ।

"सभामुखले प्रत्येक बैठकको प्रारम्भ तथा स्थगनको घोषणा गर्नेछ । तर, सभामुखले उपसभामुखलाई लिखित निर्देशन दिएमा वा सभामुख काबुबाहिरको परिस्थिति परी बैठकमा उपस्थित हुन नसकेमा उपसभामुखले बैठकको प्रारम्भ तथा स्थगन वा सभामुखले प्रारम्भ गरेको बैठकको स्थगनको घोषणा गर्नेछ ।"