काठमाडौं । सञ्चार तथा सूचना प्रविधि मन्त्रालयअन्तर्गत रहेर साइबर सुरक्षा केन्द्र सञ्चालनमा आउने भएको छ । केन्द्र सञ्चालनमा ल्याउने काम लगभग अन्तिम चरणमा पुगेको मन्त्रालयले जनाएको छ ।

सरकारले साइबर आक्रमणसम्बन्धी घटनाको प्रतिकार्य गर्न साइबर सुरक्षा केन्द्र स्थापना गर्ने निर्णय गरेको थियो । सञ्चार तथा सूचना प्रविधि मन्त्रालयले तयार पारेको सूचना प्रविधि तथा साइबर सुरक्षासम्बन्धी विधेयकको मस्यौदामा समेत यस्तो व्यवस्था छ ।

मन्त्रालयका सहसचिव एवं प्रवक्ता नेत्रप्रसाद सुवेदीले कार्यालय स्थापना गरी केन्द्र सञ्चालनमा आउने बताए । “केही काम भइसकेको छ । चाँडै नै कार्यालय स्थापना भएर उद्घघाटन हुन्छ,” सुवेदीले भने ।

केन्द्रको प्रमुखका रूपमा मन्त्रालयका सहसचिव रहने व्यवस्था छ । यस्तै केन्द्रमा निर्देशक र अन्य कर्मचारी रहनेछन् । अहिले साइबर सुरक्षा केन्द्रका लागि कार्यालय प्रमुख, निर्देशक र चार कम्प्युटर इन्जिनियर तोकिइसकेका छन् । केन्द्रले साइबर सुरक्षामा अनुसन्धान तथा विकास, साइबर सुरक्षा प्रवद्र्धन, जनचेतना अभिवृद्धिलगायत काम गर्नेछ ।

साइबर सुरक्षासम्बन्धी तयारी, चुनौतीको पहिचान, रोकथाम, प्रतिक्रिया तथा पुनर्लाभ लगायतका काम पनि केन्द्रले गर्नेछ । केन्द्रले डिजिटल फोरेन्सिक अनुसन्धानको काम पनि गर्नेछ ।