काठमाडौं । यसै महिनाको अन्तिमबाट सुरु हुने भनिएको राष्ट्रिय महिला लिग सरेको छ । अखिल नेपाल फुटबल संघ (एन्फा)ले सोमबार एक विज्ञप्ति जारी गर्दै लिग सरेको जनाएको हो । 

एन्फाले वाग्मती प्रदेश खेलकुद विकास परिषद्ले आयोजना गर्ने प्रतियोगिताका कारण लिगको पहिलो चरण पछि सरेको जनाएको छ । एन्फाका अनुसार वाग्मती प्रदेश खेलकुद विकास परिषद्को कार्यक्रम चैत २५ गतेदेखि वैशाख १ गतेसम्म हुनेछ । यसैकारण लिगको पहिलो चरण एन्फाले वैशाख ७ गतेदेखिलाई सारेको छ ।

यसअघि प्रतियोगिता चैत २३ गतेदेखि सुरु हुने तालिका थियो । लिग कर्णाली प्रदेशको सुर्खेतमा हुनेछ । जसमा सात प्रदेशका प्रादेशिक टोलीको सहभागिता हुनेछ । लिगको पहिलो चरणबाट तीन टिम राष्ट्रिय लिगका लागि छनोट हुनेछन् ।

एन्फाले छनोटको लागि आवास र यातायात खर्चहरू आयोजना गर्ने र प्रसारण गर्ने जिम्मा लिएको छ । प्रतियोगितालाई सफल बनाउन कर्णाली जिल्ला फुटबल संघ र सुर्खेत जिल्ला फुटबल संघले सहआयोजकको रूपमा सहकार्य गर्ने एन्फाले जनाएको छ ।