काठमाडौं । साउदी अरेबियाले सन् २०३४ मा आफ्नो देश ६४ राष्ट्र सम्मिलित फिफा विश्वकप आयोजना गर्न तयार रहेको बताएको छ । साउदीले आइतबार विश्व फुटबलको सर्वोच्च निकाय फिफाले विश्वकपमा ६४ देश सहभागी गराउने निर्णय पारित गरे आफ्नो देश त्यसका निम्ति तयार रहेको जनाएको हो ।

सन् २०३४ को फिफा विश्वकप आयोजनाको अधिकार साउदी अरेबियाले पाएको छ ।

“हामी तयार छौँ वा तयार हुनेछौँ । यदि फिफाले यस्तो निर्णय गर्छ भने त्यो सबैका लागि राम्रो नै हुनेछ । र, हामी यसमा आफ्नो उत्कृष्ट दिन पाउँदा झनै खुसी हुनेछौँ,” साउदी अरेबियाका राजकुमार अब्दुलअजिज बीन तुर्की अल–फैसलले भने ।

यसअघि, सन् २०३० को विश्वकपमा ६४ राष्ट्र सहभागी गराउन दक्षिण अमेरिकी फुटबल महासंघ (कन्मेबोल)ले फिफासमक्ष प्रस्ताव गरेको थियो ।