काठमाडौं । गैर आवासीय नेपाली संघ (एनआरएनए)का अध्यक्ष भवन भट्टको बीबी एयरवेजले तीन वटा जहाज ल्याउन अनुमति पाएको छ । नेपाल नागरिक उड्डयन प्राधिकरण क्यानले जहाज ल्याउन अनुमति दिएको हो ।
पाँच वटा जहाजमार्फत व्यावसायिक उडान गर्नेगरी कम्पनीले एयर अप्रेटर सटिफिकेट (एओसी)का लागि प्राधिकरणमा पत्र पठाएको थियो । उक्त कम्पनीले नो अब्जेक्सन सटिफिकेट (एनओसी) पाएको हो । कुनै पनि कम्पनीले एओसी पाउनको लागि पाँच चरणको प्रक्रिया पूरा गर्नुपर्ने हुन्छ ।
तेस्रो चरणको प्रक्रिया पूरा गरी एनओसी प्राप्त गरेको बीबी एयरवेजले एक वर्षभित्रकम तीन वटा जहाज खरिद गर्ने अनुमति पाएको प्राधिकरणका सह–प्रवक्ता ज्ञानेन्द्र भुलले जानकारी दिए ।
अब उक्त कम्पनीले चौथो चरणमा निरीक्षण तथा परीक्षण र पाँचौँ चरणमा व्यावसायिक उडानका लागि योग्य रहेको एओसी प्राप्त गर्नेछ । “अब कम्पनीले जहाज खरिद गरेपछि प्राधिकरणको प्राविधिक टोलीले जहाज ठिक छ÷छैन भनेर हेर्छ । उक्त टोलीले सबै कुरा ठिक छ भनि प्रमाणित गरेपछि एओसी पाउँछ,” भुलले भने ।
