काठमाडौं । नेपाल अन्तर्राष्ट्रिय चलचित्र महोत्सवको सातौँ संस्करण सुरु भएको छ । बिहीबार सुन्धाराको सिभिल मलस्थित क्यूएफएक्समा राष्ट्रिय तथा अन्तर्राष्ट्रिय सिनेकर्मीको उपस्थितिमा महोत्सवको उद्घाटन भएको हो ।

कार्यक्रममा प्रमुख अतिथिको रूपमा उपस्थित सूचना, सञ्चार तथा प्रविधिमन्त्री रेखा शर्माले सिनेमालाई मनोरञ्जनको रूपमा मात्रै लिन नहुने बताइन् । सिनेमाले सामाजिक रूपान्तरणका लागि महत्त्वपूर्ण योगदान दिने उनको भनाइ छ ।

साथै विश्वभरका फिल्म मेकरका लागि नेपाल महत्त्वपूर्ण स्थान रहेको बताउँदै उनले भनिन्, "हिमाल, पहाड र तराईको भौगोलिक विविधताको संगम हुनुका साथै प्राकृतिक र सांस्कृतिक हिसाबले चलचित्र छायांकनका लागि विश्वमै महत्त्वपूर्ण स्थल हो । त्यसैले सिंगो नेपाल नै फिल्म स्टुडियोको हिसाबले विकास गर्न आवश्यक छ ।"

निर्देशक तथा अभिनेता नीर शाहले वर्तमान अवस्थामा नेपाली फिल्मलाई सकारात्मक र नकारात्मक दुवै कोणबाट हेर्न सकिने बताए । "वित्तीय व्यवस्थापनको अलमल र बजार व्यवस्थापनको हेलचेक्र्याइँले गर्दा नेपाली फिल्म केही पछाडि परेको अनुभूति हुन थालेको छ । तथापि केही उच्च कोटीका प्रस्तुतिका कारणले गर्दा राष्ट्रिय चलचित्रले आफ्नो अभियानलाई सही दिशा तिर तीव्रता दिन सफलता हाँसिल गर्दै गएको पनि छ ।"

नेपालमा एकदमै थोरै राम्रा फिल्म बने पनि नराम्रा फिल्मको तुलनामा राम्रा फिल्मकै प्रभाव बढी रहेको पनि उनको भनाइ छ ।

बोर्डका अध्यक्ष भुवन केसीले यस्ता कार्यक्रम नियमित गर्न निकै कठिन रहेको बताए । सरकारका तर्फबाट कलाक्षेत्रले उचित सम्मान नपाएको बताउँदै केसीले भने, "भन्नका लागि कला संस्कृति र कलाकारलाई देशको गहना भनिए पनि नेपाली सिनेमा क्षेत्र अपहेलित छ भनेर दुःखका साथ भन्नुपर्छ ।"

बिहीबारदेखि सुरु भएको महोत्सवमा ४० देशका ८८ फिल्म तथा डकुमेन्ट्री प्रदर्शन हुँदै छन् ।

आनी छोइङ डोल्मामाथि बनेको डकुमेन्ट्री मिसनइम्पोसिबलसँगै सुरुवात भएको महोत्सवको पहिलो दिन अर्को नेपाली फिचर फिल्म डेसान पनि देखाइएको छ । चैत्र ५ गतेसम्म चल्ने महोत्सवका फिल्म छाया सेन्टर, सिभिलमल, लबिममल र भक्तपुर भाटभटेनीका क्यूएफएक्स हलमा हेर्न सकिन्छ भने सिनेमा सम्बन्धी बहस भृकुटीमण्डपस्थित राष्ट्रिय सभागृह र नेपाल पर्यटन बोर्डको हलमा हुनेछन् ।