काठमाडौं । नेपाली कांग्रेसका सांसद प्रदीप पौडेलले प्रधानमन्त्री पुष्पकमल दाहाल ‘प्रचण्ड’ले एक वर्षभित्र तेस्रोपटक विश्वासको मत लिएर अस्थिरता देखाएको बताएका छन् । बुधबार प्रतिनिधिसभा बैठकपछि सञ्चारकर्मीलाई प्रतिक्रिया दिँदै उनले प्रधानमन्त्री अस्थिर भएको टिप्पणी गरे ।

उनले नेपालमा प्रधानमन्त्रीकै कारण गठबन्धनहरू टुट्ने गरेको बताए । वर्तमान सत्ता गठबन्धन पनि धेरै समय स्थिर नहुने उनको भनाइ थियो ।

“...गठबन्धनको नेतृत्व गर्ने सन्दर्भमा प्रधानमन्त्री सफल देखिनुभएको छैन । खासगरी के हुन्छ भने गठबन्धनमा नेतृत्व गरेको दलले अथवा प्रधानमन्त्रीको कारणले गठबन्धन टुट्दैन । गठबन्धनमा आबद्ध अरूको कारणले गठबन्धन टुट्ने गर्छ,” उनले भने, “तर, अहिले र योभन्दा अगाडि के भएको छ भने प्रधानमन्त्री जो सरकारको नेतृत्व गर्नुहुन्छ, गठबन्धनको नेतृत्व गर्नुहुन्छ, उहाँकै कारणले गठबन्धन पटक–पटक तोडिएको छ । भत्किएको छ । त्यसकारण यो धेरै स्थिर हुन्छ भन्ने मलाई लाग्दैन ।”

सांसद पौडेलले वर्तमान गठबन्धनको नेतृत्व इमानदारीपूर्वक गरेर आफूलाई टिकाउन प्रधानमन्त्रीलाई आग्रह गरे । न्युज एजेन्सी नेपाल