काठमाडौं । नेपाली कांग्रेसका केन्द्रीय सदस्य प्रदीप पौडेलले अहिले नै सरकार बनाउने खेलमा लाग्न नहुने बताएका छन् । आइतबार काठमाडौंको सुकेधारामा आयोजित शिक्षक संघ वाग्मती प्रदेशको चौथो अधिवेशनमा नेता पौडेलले कांग्रेस अहिले 'भ्यागुताको धार्नी' पुर्‍याउने खेलमा लाग्न नहुने बताएका हुन् ।

“नेपाली कांग्रेस भ्यागुताको धार्नी पुर्‍याउन लाग्न हुँदैन । कांग्रेसले रचनात्मक भएर प्रतिपक्षी भूमिका निर्वाह गर्नुपर्छ । देश र जनताको पक्षमा खरो रूपमा प्रस्तुत हुनुपर्छ‚” उनले कार्यक्रममा भने ।

अहिले एमालेसँग मिलेर कांग्रेसले सरकार बनाउन लागेको हल्ला चलेको बताउँदै उनले यस्तो शंका गलत भएको दाबी गरे । साथै उनले पछिल्लो राजनीतिक घटनाक्रम र विभिन्न क्षेत्रमा उठेका शंका आशंबारे चित्रण समेत गरे ।

“यो हल्ला मात्रै हो, कांग्रेसले अहिले नै हतार गर्न हुँदैन‚” उनले भने‚ “दुईवटा ठूला पार्टी मिल्दा स्थिरता त कायम हुन्छ, तर स्थिरताले मात्रै पुग्ने स्थिति छैन । अहिले देशलाई ठूलो आर्थिक तथा प्रशासनिक व्यय भार थपिएको छ । यसलाई घटाउनु आजको प्रमुख आवश्यकता हो ।”

काठमाडौं क्षेत्र नम्बर ५ बाट निर्वाचित सांसदसमेत रहेका उनले कांग्रेस र एमाले मिल्ने अवस्था आए संविधान संशोधनमा पूर्वसहमति गर्नुपर्ने तर्क गरे । दुई ठूला पार्टी मिल्ने अवस्था आरए संविधान संशोधनमार्फत संघ तथा प्रदेशका सांसदको संख्या र मन्त्रालयको संख्या घटाउने, स्थानीय तहको संख्या घटाएर वडाको संख्या बढाउने गरी सम्झौता गर्नुपर्ने उनको भनाइ छ ।