काठमाडौं । नेपाल भित्रिने पर्यटकबाट सरकारले आर्जन गर्ने रकमको दुई गुणाभन्दा बढी रकम नेपालीहरू विदेश जाँदा बाहिरिने गरेको पाइएको छ ।

नेपाल राष्ट्र बैंकले आइतबार सार्वजनिक गरेको विवरणअनुसार चालु आर्थिक वर्ष २०८०/८१ को पहिलो सात महिनामा नेपालले भ्रमण आयस्वरूप ४५ अर्ब ४० करोड रुपैयाँ आर्जन गरेको छ ।

सोही अवधिमा नेपालीहरू विदेश जाँदा एक खर्ब चार अर्ब ७५ करोड रुपैयाँ बाहिरिएको छ । पछिल्लो सात महिनामा नेपाल भित्रिएका पर्यटकबाट संकलन भएको रकमभन्दा नेपालीहरू विदेश जाँदा बाहिरिएको रकम ५९ अर्ब ३५ करोड रुपैयाँले बढी रहेको छ ।

राष्ट्र बैंकका अनुसार सेवा खाताअन्तर्गत माघसम्म भ्रमण आय ४४.५ प्रतिशतले वृद्धि भएको छ । उक्त अवधिमा भ्रमण आय ४५ अर्ब ४० करोड रुपैयाँ पुगेको छ । अघिल्लो आर्थिक वर्ष २०७९/८० को सोही अवधिमा यस्तो आय ३१ अर्ब ४१ करोड रहेको थियो । 

चालु आर्थिक वर्षको पहिलो सात महिनामा भ्रमण व्यय ४९.९ प्रतिशतले वृद्धि भएको राष्ट्र बैंकले जनाएको छ । उक्त अवधिमा भ्रमण व्यय एक खर्ब ४ अर्ब ७५ करोड रुपैयाँ पुगेको छ । यसमध्ये शिक्षातर्फको व्यय ६६ अर्ब ६४ करोड रुपैयाँ रहेको छ । 

अघिल्लो वर्षको सोही अवधिमा भ्रमण व्यय ६९ अर्ब ८९ करोड रहेकोमा शिक्षातर्फको व्यय ४३ अर्ब ७४ करोड रहेको थियो ।

राष्ट्र बैंकको तथ्यांकले नेपाली विद्यार्थी विदेशमा अध्ययन गर्न जाँदा ठूलो रकम विदेशिएको देखिएको छ ।