श्यामकृष्ण लम्साल

फाँडे जाउलोको खोजीमा
आदिम युगबाट आधुनिक भनिएको 
सभ्यताको यात्रा गर्ने क्रममा
हाम्रा पूर्वजहरूले
भस्मे र खोरिया फाँडेकै हुन् रे, 
जंगलको रुखको बोक्रा र कन्दमूल
त्यागेको भ्रममा
गृहस्थी जीवनको थिति बाँधेका थिए रे !

अहिले पनि फाँडे जाउलोको खोजीमै
भएको घर भत्काउँदै 
कहिले आफ्नो माटोसँग लाप्पा खेल्दै
कहिले खाडी, युरोप, अमेरिकातिर हड्डी घोट्दै
कहिले मरुभूमिमा बाफिँदै
छटपटाइरहेको सुन्नु, बुझ्नुपर्दा
आजको मान्छे कसरी आधुनिक भयो त ?

हाम्रा अग्रजहरूले हलो जोत्थे रे,
हामी शिरदेखि तीरसम्म जोतिरहेका छौँ 
सपनाको घडेरीमा सपनाकै बिल्डिङ ठोक्छौँ
जानेसम्मको अलेखा सपना जोड्ने प्रयत्न गर्छौँ 
तर पनि संसारमै किन गरिब ठहरिन्छौँ ?

आखिर जन्मजन्म
फाँडे जाउलोमै संघर्ष गरिरहनुपर्ने भए
आजको मान्छे 
कसरी आधुनिक हुन पुग्यो हँ ?

(भोजपुर)