काठमाडौं । राष्ट्रिय जनमोर्चाका अध्यक्ष चित्रबहादुर केसीले सहकारी संस्थाको ऋणीका समस्या देखाउने नेताहरूका चरित्रमा प्रश्न उठाएका छन् । बिहीबार प्रतिनिधिसभा बैठकमा दलीय आधारमा बोल्ने क्रममा उनले ऋणीका चर्का कुरा गर्नेले सँगै राखेका व्यक्तिलाई स्वार्थमा संरक्षण गरेको आरोप लगाए ।

“यहाँ सहकारीपीडितको चर्का कुरा गर्दै हुनुुहन्छ,” केसीले भने, “कुनै मानिसको चरित्र के छ, इतिहास के छ तपाईंहरूलाई थाहा छैन ? स्वार्थ पूरा गर्न पाए केही मतलब छैन ?”

उनले त्यस्तो व्यक्तिको नाम भने खुलाएनन् । राजनीतिक दल र नेताको संरक्षणमा ठगी धन्दा चलिरहेको उनको भनाइ छ ।

“राजनीतिक दलका नेताको संरक्षण नभईकन तिनीहरूले ठगेका छन् ?,” केसीले भने, “हामीले ल्याएको गणतन्त्र, लोकतन्त्रमाथि कालो बादल मडारिएको छ । तर, त्यसतर्फ कसैको चिन्ता छैन ।”

अध्यक्ष केसीले अहिले नयाँ गठबन्धनको चर्चा भइरहेको भन्दै गत वर्ष पनि यति बेला यस्तै भएको स्मरण गरे । “नेपालमा राजनीति गर्नु भनेको जे गरे पनि हुन्छ ? पदमा पुग्नु नेपाली जनताका लागि होइन, पद भजाएर निजी स्वार्थ पूरा गर्नुपर्छ, नेपाली राजनीतिको चरित्र,” उनले भने, “पोहोर साल पुस १० गते प्रधानमन्त्री एकाएक बालकोट जानुभयो । प्रधानमन्त्रीलाई सबैको समर्थन, फेरि फर्किएर बूढानीलकण्ठ पुग्नुभयो, फेरि सबैको समर्थन । प्रतिपक्षमा हामी मात्रै ।”

उनले वर्तमान सत्ता गठबन्धनको गलत व्याख्या गरिएको भन्दै वाम नै नभएको ठाउँमा वामपन्थ नहुने टिप्पणी गरे । “अहिले पनि अर्को गठबन्धन बन्यो, यसलाई वामपन्थी एकता भनिँदै छ । छातीमा हात राखेर सोच्नुस् त, तपाईंहरूको चरित्र के छ ?,” केसीले भने ।

उनले नयाँ गठबन्धनमा कुनै ‘देवता’ नआएको भन्दै यसबाट केही आस गर्न नसकिने बताए । “यहाँ गठबन्धनमा आबद्ध हुन कुनै नदेखेको देउता आएको हो र ?,” केसीले भने, “राजनीतिक जात्रा गर्नेहरूले विचार गरौँ । हामी सच्चिऊँ, सच्चिएनौँ भने विदेशीको क्रीडास्थल बनाउँदै छौँ ।”

उनले अहिलेको व्यवस्था गए लामो समय पुस्तौँपुस्ताले दुःख पाउने चेतावनी दिए । “यो लोकतन्त्र गणतन्त्र गयो भने तपाईंहरू कहाँबाट उफ्रनुहुन्छ ?,” केसीले भने, “यति ठूलो निराशा छ कि यो व्यवस्था दुर्घटनामा पर्‍यो भने सम्हाल्न सक्नु हुने छैन । आफ्ना नेता फसे चोख्याउने, अरूलाई देखाउने प्रवृत्तिले देशलाई राम्रो गर्दैन । जनतालाई निराश नपारौँ । विगतमा गरेका गल्ती–कमजोरीमा आत्मआलोचित बनौँ ।”

उनले सत्ताका निम्ति विदेशीका मुद्दा बोक्ने दलहरूका कारण राष्ट्रियता र सार्वभौमसत्ता नै जोखिममा परेको बताए । “तपाईंहरूलाई विदेशीको मुद्दा बोक्न कुनै लाज छैन । पहिलेपहिले संघीयता नहुँदा यो जात्रा सिंहदरबारमा मात्र थियो, अहिले आठ ठाउँ विस्तारित भएको छ,” उनले भने, “देशमा कोही बस्दैन । हाम्रा छोरानाति विदेश पठाउनुपर्छ भने किन चाहियो संघीयता ? किन चाहियो यति ठूलो खर्च ?”

उनले नेता र कर्मचारीका चरित्र एकात्मक भए पनि खर्च संघात्मक भएको टिप्पणी गरे । “नेपालका नेताहरूको प्रवृत्ति, चरित्र एकात्मक, कर्मचारी प्रशासनको चरित्र एकात्मक, खर्च संघात्मक किन चाहियो ?,” केसीले भने, “देशको राष्ट्रियता, सार्वभौमसत्ता खतरामा छ । नेताहरूलाई यसबारे चिन्ता समेत छैन ।”