काठमाडौं । नेकपा (एकीकृत समाजवादी)का प्रमुख सचेतक मेटमणि चौधरीले सधैँ धोका नदिन प्रधानमन्त्री पुष्कमल दाहाल ‘प्रचण्ड’लाई अनुरोध गरेका छन् । उनले थाहै नदिई गठबन्धन छोड्ने काम गलत भएको टिप्पणी गरे ।

बिहीबार प्रतिनिधिसभा बैठकमा उनले पार्टी अध्यक्ष माधवकुमार नेपालले सधैँ प्रचण्डको बखान गरेर सरकार टिकाउन ‘मरिहत्ते गरेर बसेको’ उल्लेख गरे । तर, उनी ‘सुतिरहेको अवस्थामा किन गठबन्धन तोडेको ?’ भन्दै चौधरीले प्रश्न गरे ।

“अब हामीलाई छोडेर नजानु होला । हामी साथमा छौँ, कति बेला छुट्छौँ थाहा नै पाउँदैनौँ,” उनले भने, “हाम्रो अध्यक्ष माधव नेपालजस्तो असल, इमानदार मान्छेलाई थाहै नपाईकन गठबन्धन तोडियो । उहाँले सधैँ प्रचण्डको बखान गर्नुभएको छ, प्रचण्डको सरकार बनोस् भन्ने चाहना छ । सुतिरहेको बेला छुटेको थाहा हुँदैन, कस्तो गजब छ ।”

उनले पुरानो गठबन्धनमा गरिएको सहमति, सम्झौता हाँसो र खरानीको डल्लो भएको भन्दै यो विषयमा जवाफ दिनुपर्ने बताए ।

उनले अहिलेको गठबन्धनमा रहेका दलले कति साथ दिन्छन् थाहा नभएको बताए । आफूहरूले प्रधानमन्त्रीलाई सधैँ साथ दिने उनको भनाइ छ ।

उनले आफ्नो पार्टी प्रचण्डलाई बहुमत पुर्‍याइदिने अस्त्र मात्र बनेको भन्दै सांकेतिक रूपमा चित्त दुखाए । “किनभने, हामी बदला वा इगो केही बन्दैनौँ । हामी तपाईंलाई प्रधानमन्त्री बन्न आवश्यक बन्ने अंक पुर्‍याइराख्छौँ । तर, याद गर्नुहोला– जसको जगमा तपाईं प्रम बन्नुभयो, सरकार बनेको छ, ती राजनीतिक दलहरूलाई सँगै राख्नुहोला,” उनले थपे, “मलाई विश्वास छ, ती राजनीतिक दलले १५० प्रतिशत साथ दिन्छ । तर, तपाईंले ती राजनीतिक दललाई छोडेर नजानु होला । अबचाहिँ यसो नगर्नु होला, बर्बाद भइसकेको छ । दुनियाँ हाँसेको हाँस्यै छ ।”

उनले नेकपा (एमाले)जस्तो पार्टीको साथ रहेको र राष्ट्रिय स्वतन्त्र पार्टी (रास्वपा)ले बल दिएको भन्दै थपे, “एमालेजस्तो लार्जेस पाटीको साथ पाउनुभएको छ । रास्वपा छ, आवश्यक पर्ने दम पावर पाउनुभएको छ । मलाइ लाग्छ, राम्रै हुन्छ ।”

उनले हिजोको दिनले एउटा कुरा स्थापित गरेको भन्दै हालसम्म प्यास लागेको मान्छे घैँटो लिएर कुवा जाने गरेको टिप्पणी गरे । तर, केही दिनअघिदेखि कुवा आफैँ भाग्दै हिँडेको र त्यो प्रधानमन्त्री प्रचण्ड भएको उनको टिप्पणी थियो ।