काठमाडौं । नेपाली कांग्रेसका नेता डा. शेखर कोइरालाले सत्ता गठबन्धन टुट्दा निर्वाचनको ‘म्यान्डेट’को पालना नभएको टिप्पणी गरेका छन् । त्यसले कांग्रेसलाई घाटा मात्र नहुने उनले बताएका छन् ।

सभापति शेरबहादुर देउवाको निवास बूढानीलकण्ठमा सोमबार बिहान बसेको पदाधिकारी र पूर्वपदाधिकारीको बैठकपछि डा. कोइरालाले गठबन्धन टुट्दा कांग्रेसलाई तत्कालका निम्ति घाटा भए पनि दीर्घकालमा फाइदा हुने बताए ।

“गठबन्धन टुटुदा तत्कालका लागि घाटा देखिन्छ । हाम्रा केन्द्र सरकारका मन्त्री, प्रदेश सरकारमा मुख्यमन्त्री र मन्त्रीहरूका पद गएका छन् । उहाँहरूले सरकारबाट जनतामा डेलिभरी दिने अवसर टुटेको छ,” उनले भने, “तर, यसको माने यो होइन कि कांग्रेसले सब चिज गुमायो । कांग्रेसलाई अर्को अवसर आएको छ, जनतामा जाने र पार्टी निर्माण गर्ने ।”

कोइरालाले कांग्रेसले आफूलाई जनताकेन्द्रित गरेपछि कसैसँग गठबन्धनको बाध्यता हटेर जाने तर्क गरे । उनले हिजो पनि कांग्रेस एक्लै निर्वाचनमा प्रतिस्पर्धा गर्ने पक्षमा रहेको भन्दै नेकपा (माओवादी केन्द्र)को आग्रहमा गठबन्धन गर्नुपरेको बताए ।

माओवादी केन्द्रका अध्यक्ष पुष्पकमल दाहाल ‘प्रचण्ड’ले गठबन्धन तोड्दा जनतासँग गरेका शान्ति, विकास र स्थिरताको वाचामा चुकेको पनि उनले बताए । “हिजो ०७९ को चुनावमा हामी एक्लै चुनावमा जान चाहन्थ्यौँ । स्थानीय तहको चुनावदेखि नै उहाँहरू गठबन्धनमा रहन चाहनुभयो । गठबन्धन सरकार भएकाले कांग्रेसले त बाध्यात्मक रूपमा मात्र गठबन्धन गरेका थियो,” कोइरालाले भने, “जनतासँग गरेका वाचा प्रचण्डजीले भुल्नुभयो । अब उहाँलाई नै जनताले सोध्नेछन्– उहाँको वाचा कहाँ गयो ?”

कांग्रेसका नेता–कार्यकर्ताले गठबन्धन टुटेर निराश हुनु नपर्ने उनले बताए । पार्टीमा एकता र सहकार्यको संस्कृतिसहित नागरिकका समस्या सुन्ने काममा लागे समय आएपछि सरकार आफैँ आफ्नो पक्षमा आउने उनको भनाइ थियो ।