काठमाडौं । हास्य कलाकार हरिवंश आचार्यले चलचित्रमा नकारात्मक क्यारेक्टरमा काम गर्न आफूलाई समस्या नरहेको बताएका छन् । ‘हरिबहादुर मदनबहादुर’मा हरिबहादुरको क्यारेक्टरमा समेत काम गरेकाले सिनेमामा खलपात्रको क्यारेक्टरमा काम गर्न आफूलाई समस्या नरहेको उनको भनाइ छ ।

“हरिबहादुरमा नकरात्मक क्यारेक्टर गरेको भनेर गुहेश्वरीमा फूल बेच्ने दिदीले मलाई ढुंगाले हान्नुभयो,” आइतबार काठमाडौंमा महाजात्रा चलचित्रको ट्रेलर रिलिज कार्यक्रममा भने, “मलाई योभन्दा पनि नेगेटिभ रोलमा काम गर्ने रहर छ । हिटलर भएर काम गर्ने रहर छ ।” 

कलाकार एकै खालको भूमिकामा खुम्चिएर बस्न नहुनेमा उनको जोड छ । “महापुरुषमा म आदर्शवादी पुरुषको चरित्रमा काम गरेँ । म सधैँ एकै खालको क्यारेक्टरमा काम गरेँ भने डाउनफल हुन्छ,” हरिवंश भन्छन्, “यो सिनेमामा महाभ्रस्ट पुरुष भएर खेल्न पाएँ । यस्तैयस्तै फरक रोलमा काम गर्ने रहर छ ।”

‘महापुरुष’ले आफूलाई सिनेमामा एक खुड्किलो माथि चढाएको उनले स्मरण गरे । “अरू सिनेमाबाट अफर आउँदा मलाई खेल्ने कि नखेल्ने भनेर डर लाग्छ । कथा कस्तो छ भन्ने डर लाग्छ,” उनले अगाडि भने, “तर, जात्रा टिमले नबोलाउने हो कि भनेर डर लाग्छ ।” 

प्रदीप भट्टराईको लेखन तथा निर्देशन रहेको चलचित्र ‘महाजात्रा’मा हरिवंशले खलपात्रका रूपमा अभिनय गरेका छन् । हरिवंशसँगै यो चलचित्रमा विपीन कार्की, रवीन्द्र सिंह बानियाँ, रवीन्द्र झा, वर्षा राउतलगायत कलाकार मुख्य भूमिकामा छन् । चलचित्र चैत ९ गते रिलिज हुँदै छ ।