काठमाडौं । काठमाडौंसहित देशका धेरै स्थानमा अहिले वर्षा भइरहेको छ । हल्का वर्षा भएको मौसम पूर्वानुमान महाशाखाले जानकारी गराएको छ । 

काठमाडौंमा आइतबार बेलुकासम्मै वर्षा हुने सम्भावना रहेको महाशाखाका मौसमविद् गंगा नगरकोटीले जानकारी दिइन् । निरन्तर वर्षा नभएर रोकिने, पर्ने हुन सक्ने उनको भनाइ छ ।

“काठमाडौंमा आज बेलुकासम्मै वर्षा हुने सम्भावना छ,” उनले बाह्रखरीसित भनिन्, “निरन्तर नभएर केही बेर रोकिने, फेरि पर्ने हुन्छ । बिहान एक छिन परेको थियो, केही बेर रोकिएर अहिले फेरि परिरहेको छ ।”

काठमाडौंमा अहिले मेघगर्जनसहित हल्का वर्षा भएको उनले बताइन् । काठमाडौंमा आइतबार बेलुकादेखि पानी पर्न कम हुने उनले जानकारी दिइन् । बादल भने लाग्ने उनले बताइन् ।

देशका उच्च पहाडी तथा हिमाली भू–भागमा अहिले हिमपात समेत भइरहेको महाशाखाले जनाएको छ । महाशाखाका अनुसार, पश्चिमी वायुको प्रभावका कारण बदली, वर्षा र हिमपात भएको हो ।

पछिल्लो २४ घण्टा (शनिबार दिउँसो १ देखि आइतबार दिउँसो १ बजेसम्म)मा सबैभन्दा बढी वर्षा मनाङमा भएको मौसमविद् नगरकोटीले जानकारी दिइन् । “पछिल्लो २४ घण्टामा मनाङमा सबैभन्दा बढी ३७.४, सुर्खेतमा २७.६, दैलेखमा २५.२ मिलिमिटर वर्षा भएको छ,” उनले भनिन् ।

काठमाडौंको वर्षाको विवरण भने तत्काल उपलब्ध नरहेको उनले बताइन् । देशभरको मौसममा सोमबारदेखि क्रमिक रूपमा सुधार हुने महाशाखाले जनाएको छ ।