अंगद श्रेष्ठ ‘प्रयास’

मजबुरीको फाइदा  
उठाउन सकिनँ 
कायर भन्छन् 
भन्छन्– कमजोर छस्
सायद
छेपारोले रङ फेरेजस्तै 
जमानाअनुसार आफूलाई फेर्न सकिनँ !

पद, पैसा, शक्ति नै रहेछ मापदण्ड
कलियुगको भगवान् बन्न
मानवता आत्मसात् गर्दै 
छद्म दुनियाँमा बेइमान बन्न सकिनँ !

अनुशासन र संस्कार तोड्न नसक्नेले
समाज बदल्ने सपना देख्न हुन्न रे !  
चलअचल धनको अभावमा 
पुँजीवादको विशेषता बुझ्न सकिनँ !

शून्यबाट सुरु 
शून्यमा विलीन हुन्छ जीवन
सतिसालझैँ ठिंग उभिन 
कडा हुनुपर्छ मन
सिद्धान्तमा इमान, लक्ष्यमा ढृढता बनाए
परिवर्तित दुनियाँमा 
इमानदारीको जित देखिनेछ एक दिन ।

(गुलरिया–६, बर्दिया)