काठमाडौं । प्रतिपक्षी नेकपा (एमाले)ले प्रधानमन्त्री पुष्पकमल दाहाल ‘प्रचण्ड’लाई संसद्प्रति जवाफदेही बन्न आग्रह गरेको छ । आजको प्रतिनिधिसभा बैठकमा एमाले सांसद् सूर्य थापाले फागुन ६ गतेदेखि उठेका र ध्यानकर्षण गर्नका लागि पटक–पटक रुलिङ हुँदा पनि प्रधानमन्त्री उपस्थित नभएको भन्दै आपत्ति प्रकट गरे । 

उनले १४ गतेको बैठकमा सभामुखले अर्को बैठकमा जवाफ दिन रुलिङ गरे पनि प्रधानमन्त्री अनुपस्थित भएको भन्दै खोजी गर्न माग गरे । “प्रधानमन्त्रीज्यू छोरीको नगरपालिकातिर कता हुनुहुन्छ भन्ने सञ्चारमाध्यमबाट सुनेका छौँ । प्रधानमन्त्रीको खोजी गर्नुपर्यो । सरकारलाई संसद्प्रति जवाफदेही बन्नुपर्यो,” थापाले भने । 

उनले प्रधानमन्त्रीको खोजी गर्न संसदीय समिति बनाउने कि संसद् स्थगित गर्ने भन्दै कटाक्ष गरे । “सरकार जवाफदेही भएन । सरकार हरायो । प्रधानमन्त्री हराउनुभयो । प्रधानमन्त्रीको खोजी गर्नुपर्यो । प्रधानमन्त्रीको खोजी गर्न संसदीय समिति बनाउनुपर्ने हो कि ? संसद् स्थगित गर्नुपर्ने हो ? कति दिन समय चाहिने हो ?,” उनले भने ।