काठमाडौं । जान निकोल लोफ्टी–इटोनको कीर्तिमानी ब्याटिङप्रेरित नामिबियाले त्रिदेशीय ट्वान्टी–२० शृंखलाको पहिलो खेलमा नेपालसामु २०७ रनको लक्ष्य प्रस्तुत गरेको छ ।

मंगलबार कीर्तिपुरस्थित त्रिवि क्रिकेट मैदानमा इटोन विस्फोटक रूपमा प्रस्तुत भएपछि टस जितेर ब्याटिङमा उत्रिएको नामिबियाले निर्धारित २० ओभरमा चार विकेट गुमाएर २०६ रन बनायो ।

इटोनले १०१ रनको सानदार इनिङ खेले । उनी ट्वान्टी–२० अन्तर्राष्ट्रिय क्रिकेटमा सबैभन्दा छिटो शतक बनाउने ब्याटर समेत बने । इटोनले ३६ बलमा ११ चौका र आठ छक्का प्रहार गरे । ३३ बलमा शतक बनाउँदै इटोनले नेपालको कुशल मल्लका नामम रहेको कीर्तिमान भंग गरेका हुन् ।

यसअघि, एसियन गेम्समा मंगोलियाविरुद्ध ३४ बलमा शतक प्रहार गर्दै कुशल ट्वान्टी–२० अन्तर्राष्ट्रिय क्रिकेटमा सबैभन्दा छिटो शतक बनाउने ब्याटर बनेका थिए ।

६२–३ को अवस्थामा ब्याटिङका निम्ति आएका इटोनले चौथो विकेटका लागि मलान क्रुजरसँग १३५ रनको कीर्तिमानी साझेदारी गरे । ट्वान्टी–२० अन्तर्राष्ट्रिय क्रिकेटमा यो नै नामिबियाले बनाएको अहिलेसम्मको उच्च साझेदारी हो । सन् २०१९ मा सिजी विलियम्स र जेपी कोट्जेले बोत्सवानाविरुद्ध ११२ रनको साझेदारी गरेका थिए ।

खेलको ११औँ ओभर सकिँदासम्म नामिबियाले तीन विकेट गुमाएर ६६ रन बनाएको थियो । यसपछि इटोन र क्रुजरको आक्रामक साझेदारीसँगै नामिबियाले पछिल्लो नौ ओभरमा १४० रन जोड्यो ।

नामिबियाविरुद्ध नेपालका कप्तान रोहितकुमार पौडेलले दुई विकेट लिए । चार ओभर बलिङ गरेका रोहितले ३० रन खर्चिए । करण केसी र अभिनाश बोहराले समान एक विकेट लिए ।

ट्वान्टी–२० विश्वकपको तयारीस्वरूप आयोजित शृंखलामा नेपाल, नामिबिया र नेदरल्यान्ड्स सहभागी छन् ।