काठमाडौं । नेपाली कांग्रेसको भ्रातृसंस्था नेपाल विद्यार्थी संघमा पुनः विवाद देखिएको छ । संघको मंगलबारदेखि हुने भनिएको वर्तमान केन्द्रीय समितिको पहिलो बैठक पनि विवादित बन्ने देखिएको छ ।

संस्थापनइतर अर्थात् शेखर कोइरालानिकट विद्यार्थी नेताहरूले संघको छुट्टै बैठक बोलाउने बताएका छन् । सो समूहका नेता भुवन भट्टले अध्यक्ष दुजाङ शेर्पाले फरक पक्ष र विचार एवं धारणा राख्नेलाई ‘बाइकट’ गरेकाले छुट्टै बैठकको तयारी गरिएको जानकारी दिए ।

“भोलि केन्द्रीय समिति बैठक भनिएको छ, फरक विचार र फरक धारणा राख्ने पक्षसँग कुनै सल्लाह छैन । हामी छुट्टै बैठक राख्ने, संगठनका पक्षमा विधिविधानको रक्षा गर्ने र नेविसंघ साँच्चिकै महाधिवेशनउन्मुख गराउने निर्णय गरेर अगाडि बढ्ने तयारीमा छौँ,” उनले भने, “हाम्रो समूहबाट प्रतिनिधित्व गर्ने सबै केन्द्रीय समितिका साथीहरू सामूहिक रूपमा अब वर्तमान अध्यक्षका अवैधानिक गतिविधि र मनोमानी प्रवृत्तिविरुद्ध खरो भएर उत्रनेछौँ । नेविसंघको गरिमा बचाउन लाग्छौँ ।”

इतर समूहले कांग्रेस कार्यसम्पादन समितिले गरेको निर्णय समेत संघ अध्यक्षले उल्लंघन गरेको आरोप लगाएको छ । “संगठनको महधिवेशन, संगठनभित्र देशभरि नै विवाद छरपस्ट हुँदा पनि आफ्नो तदर्थ समितिको अध्यक्ष पदको कार्यकाल लम्ब्याउन अधिवेशन असार १५ मा गर्ने भनी कार्यतालिका ल्याएर नाटक मञ्चन भइरहेको छ,” भट्टले भने ।

महाधिवेशनपूर्व गर्नुपर्ने काम नगरेर अध्यक्ष गैरजिम्मेवार बनेको, सदस्यता वितरण नगरिएको र सबै जिल्लामा समानान्तर गतिविधि भइरहँदा विवाद समाधानमा अध्यक्षले कुनै चासो नदेखाएको इतर समूहको आरोप छ  ।