गोदावरी ललितपुर । नेपाली कांग्रेसको महासमिति बैठकको समापन समारोहमा पेस गर्ने प्रतिवेदन तयार गर्न छलफल जारी छ ।

ललितपुरको गोदावरीस्थित गोदावरी भिलेज रिर्सोटमा महामन्त्री, प्रचार विभाग प्रमुखसहित अन्य नेताहरू बसेर प्रतिवेदन तयार पार्ने काम भइरहेको प्रचार विभाग प्रमुख मीनबहादुर विश्वकर्माले जानकारी दिए । 

सोमबारदेखि सुरु भएको महासमिति बैठक आज सकाउने तयारी छ । केही बेरअघि सकिएको पदाधिकारी र पूर्वपदाधिकारी बैठकले महासमिति बैैठक समापनको प्राविधिक तयारीबारे छलफल गरेको थियो । छलफलले पदाधिकारी, पूर्वपदाधिकारी मुख्यमन्त्रीलाई दुई–दुई मिनेट बोल्न दिने निर्णय गरेको थियो । 

“महासमिति बैठकको समापन समारोहमा पेस गर्ने प्रतिवेदनको तयारी गरिँदैछ । यसका लागि महामन्त्रीसहित केही नेताहरू बसेर प्रतिवेदन तयार पार्दैछौँ,” उनले भने । महासमिति बैठकको आज चौथो दिन समापन गरिँदैछ । बैठकमा विभिन्न पाँच वटा प्रतिवेदनमाथि चार वटा समूहमा छलफल जारी छ ।